Commonwealth Games 2018 Pathumna nichungin India-in Australia a mangtha

Gold Coast, Australia-a Commonwealth Games vawi 21-na chu nimin khan neih zawh a ni ta a, India chuan a pumpuiah pathumna dinhmun luah chungin he infiamna khawmpui hi an mangṭha ta.

India hian a pumpuiah medal 66 lain goal ringawt pawh 26 a la a, silver 20 lain bronze 20 a la thung. India-in tun ṭum aia medal a lak hnem zawk ṭum chu 2002 Melbourne Games-a medal 69 a lak leh 2010-a New Delhi-a medal 38 a lak te kha a ni.

India ropuina

Shooting chu India ropuina ber a ni a, he infiamna huang aṭang ringawt hian India chuan medal 16 lain gold a lak zat ringawt pawh pasarih ngawt a tling. Inbuan lamah India ram inchai chak te an che ropui bawk a, wrestling aṭanga India-in medal a hawn zat ringawt hi panga a tling.

Ritchawi lamah pawh India an che ropui. Gold panga ngawt weightlifting aṭang hian an la a, a vaiin medal pakua an rawn hawn. Boxing-ah pawh India an ropui chhunzawm zel a, medal pakua ngawt an la ve bawk. Table Tennis (8 medal), Badminton (6), Athletics (3), Squash (2) leh powerlifting (1) aṭangin India-in medal an hawn bawk.

Infiammi langsar

Indian infiammi zingah Saikhom Mirabai Chanu chuan gold medal a hlawh chhuak hmasa ber a, Women's 48 kg ho rit inchawi siakah Manipur nula hian chawi rit thei berin India medal hmasa ber hi a hlawh chhuak. Medal hrim hrim hlawh chhuak hmasa ber erawh weightlifter P Gururaja a ni a, men's 56 kg-ah silver a la.

India tana feh chhuak infiammi langsar zingah Mary Kom chuan CWG-a a hmel a inlan hmasak berah gold medal a hnek chhuak nghal a, Sushil Kumar chuan wrestling-ah gold a buan chhuak ve bawk. Badminton lamah Saina Nehwal chuan gold a hlawh chhuak a, CWG laia world no.1 dinhmun luahtu Kidambi Srikanth erawh silver-ah a lungawi a ṭul thung.

Commonwealth Games 2018 neih zawh takah Mizo nula pahnih Lalremsiami leh Lalchhanhimi chu India aiawha feh chhuak infiammi 221 zingah an tel a, medal erawh an hawn thei lo.

India hmeichhe hockey team-a player 18 koh zingah Remsiami a tel a, kum 17 mi lek niin squad-a player naupang ber a ni. Kolasib College Veng nula hi India tan player pawimawh zingah a tel phak a, 4-1 a Malaysia an sawp ṭumin goal khat a khung.

Hmeichhe hockey team hian gold beiseina sang tak nei mah se semifinal-ah 1-0 in Australia an ngam lo a, bronze medal inchuhnaah group stage lama an lo hneh tawh England chu 6-0 ngawta an ngam loh leh avangin kut ruakin an rawn haw.

Khawzawl nula Lalchhanhimi chu 90kg category-ah India tan a inlan a, kg 194 chawiin pariatna a ni a, India tan medal a hawn thei lo. Mizo nula pahnih ten medal hawn thei lo mah se CWG an khel phak ringawt pawh hi a ropui hle.

India tan kum 15 mi Anish Bhanwala chuan men’s 25m rapid fire pistol-ah gold a la a, Indian infiammi zinga Commonwealth Games-a medal la thei naupang ber a ni.

Indian shooter hi class X zirlai chauh a la ni a, CBSE chuan CWG-a a inlan a ṭul avang hian a in exam hun tur a hranpain an duan sak hial!

Haryana rawlthar chuan, "April 16 (Hindi), 17 (Social Studies) leh 18(Maths)-ah te a zawn zatin exam ka nei a, mah se CWG-ah hian ka lehkhabu ka ken avangin lehkha zirna hun chu ka nei tho a ni," a ti!

Hetihlai hian Neeraj Chopra chuan Inrinni khan India tan javelin throw-ah gold medal a la ve bawk a, India-in Athletics-a gold medal a hlawhchhuah awmchhun niin kum 20 mi Neeraj hian ngaihven a hlawh hle.

Table tennis-ah India an ropui a, he infiamna huang aṭang ringawt hian India chuan medal pariat an hawn. India tana player langsar chu Manika Batra a ni a, medal pali nen India-ah a rawn haw.

April 8 khan Manika hian a medal hmasa ber a hlawh chhuak a, India hmeichhe team-in Singapore hneha gold an hlawhchhuah ṭumin Mouma Das, Sutirtha Mukherjee, Madhurika Patkar leh Pooja Sahasrabudhe-te nen an

ṭang ho.

Manika hi Mouma Das nena ṭangdunin women's doubles final an lut bawk a, silver an la. April 14-ah kum 22 mi lek Indian nula hian gold a lak chhunzawm a, Singapore nula Mengyu Yu chu 4-0 in a hneh.

Commonwealth Games tawp ni, nimin khan Manika hi a inlan leh a, mixed doubles lamah Manika Batra leh Sathiyan Gnanasekaran nena ṭang dunin bronze an la.

Badminton-ah India hming a ropui a, hmeichhe singles final-ah India mi ve ve Saina Nehwal leh PV Sindhu an inhmachhawn a, a tawpa dingchang zawk chu tawnhriat ngah zawk Saina Nehwal a ni.

World no.1 hlui Saina Nehwal hian world no. 3 nilai PV Sindhu hi 21-18, 23-21 in a hneh a, vawi nga an intawn tawha vawi li hnehna a channa a ni ta. World no. 12 ni mek Saina leh Sindhu intawn hnuhnung ber chu nikuma National Badminton Championships an khelh kha a ni a, Saina hian 21-17, 27-25 in hnehna a chang.

Hetihlai hian mipa lama India-in gold medal a beiseina world no.1 Kidambi Srikanth chuan final-ah hnehna a chang zo lo a, Malaysian legend Lee Chong Wei lakah 19-21, 21-14, 21-14 a tlawmin silver-ah a lungawi a ṭul.

India-in badminton aṭang ringawta medal a hlawhchhuah zat hi paruk a ni a, gold medal pahnih, silver pathum leh bronze pakhat an la.

Eizawnna lama dentist, India tana Commonwealth Games 2018-a feh chhuak Heena Sidhu chuan medal pahnih awrh chungin CWG a mangṭha.

Heena hian women's 25m pistol (Precision/Rapid) final-ah phei chuan Commonwealth Games record a siam a, 38 score-in gold a la chiang hle.

Kum 28 mi nuimawi tak mai Heena hian 10m air pistol-ah silver medal a la bawk a, a hmelin a zir tel avangin Indian infiammi zingah ngaihven a hlawh zual.



Share this Post

Login to comment
No Comments