Sunrisers an chak leh ta

Indian Premier League khelh mekah Sunrisers Hyderabad-in wicket khat leka Mumbai Indians an hneh hnuah hnehna an chang lehnghal a, Inrinni zan khan Kolkata Knight Riders chu wicket ngain an hneh.

KKR tan hian run 49 siamtu Chris Lynn che ṭha viau mah se a ṭhian dangte zingah run 30 siam tling thei an awm lo a, Kolkata club-in over 20-ah run 138 chiah siamin wicket riat an hloh. 

Sunrisers-in target an umna kawngah beisei an phak bik lo a, opener pahnih Wriddhiman Saha (24 runs) leh Shikhar Dhawan (7) te chet dan ngaihtuah phei chuan an dinhmun a him bik lo. 

Mahse, captain Kane Williamson chuan a naute tan entawn tur ṭha hnutchhiahin run 50 a rawn siam a, over 19-ah an target umphain wicket nga chiah an hloh a, hnehna an chang. 

Inrinni zan inkhel dangah Delhi Daredevils chuan wicket sarihin Mumbai Indians an hneh bawk. MI tan bul ṭantu Suryakumar Yadav (53 runs), Evin Lewis (48) leh Ishan Kishan (44) te an chet ṭhat avangin over 20-ah run 194 an siam a, wicket sarih an hloh.

Mumbai Indians run siam zat ngaihtuahin an chak mai dawn niin a lang. Mahse, beisei ang ngawt a ni lo. Delhi tan opener Jason Roy chuan run 91 a rawn vaw chhuak nghal a, Rishabh Pant (47 runs) chuan a pui ṭha bawk. 

Delhi hian over 20-ah run 195 siamin wicket thum an hloh a, an chak dan a mawi tawk hle.

Zirtawpni zan inkhelah Royal Challengers Bangalore chuan wicket liin Kings XI Punjab an hneh ve bawk a,  RCB tan run 57 siamtu AB de Villiers chu chakna hnar a ni.



Share this Post

Login to comment
No Comments