Taekwondo Championship zo fel

Mizoram Amateur Taekwondo Association buatsaih Mizoram Official Taekwondo Championship vawi 21-na chu April 13 khan Electric Veng YMA Hall-ah kharna neih niin, Aizawl Taekwondo Academy, Electric Veng an Champion.

Mizoram Taekwondo thiam ber zawnna Champion of Champions (CoC) 2018 title chu Lalramdinthara (Thenzawl Taekwondo Club) chuan a vawi thum nan a la, ani hian vawi li lai CoC title lo la tawh Johny Vanlalruatsanga a hneh a ni.

Ramhlun Sporting Club team chuan point 61 hmuin best fighting spirit team trophy an la a, point 59 hmutu Kolasib Taekwondo Club chu most promising team niin; Sports Authority of India chuan point 51 hmuin Best Discipline trophy an la bawk. Poomsae inelna huangah bik Republic Vengthlang Taekwondo Club chuan Champions Trophy an chawi. 

Hmeichhe inelna huangah Kaplianzawni (Ramthar/R&J Taekwondo Club) chuan CoC title a la a, championship chhunga khel ṭha ber a thlan, Zothansangi (SAI) & Lalbiakhlua (ATA) te hnenah best fighter trophy hlan a ni a. 

Inelna ngaihhlut Mizoram Official Championship-ah hian team 28 aṭangin taekwondo player 632 an tel a ni.



Share this Post

Login to comment
No Comments