PVL league round a zo

RS Traders Pro Volleyball League chu Zirtawpni zan khan league match hnuhnung ber khelh zawh a ni ta a, kai thar team pahnih inkhelah Tuichangral chuan ITI Veng lakah 26-24, 25-14, 25-21 in hnehna an chang. 

Semifinal hi April 17, Thawhlehni zanah khelh ṭan a ni dawn a, Durtlang North leh Tuichangral te an inhmachhawn ang. Nilaini zanah Hunthar Veng leh TNT ten semifinal hnuhnung zawk an khel ang.

R. Dengṭhuama Indoor Stadium, Mualpuia inkhelah semifinal lut chiang tawh Tuichangral lamin harsatna an tawk lo. Shivendra chuan point 31 hmuin 10 a paih a, vawi li nan RFL Plastics player of the night atan thlan a ni a, tualchhung player Lallunghnema chuan point 10 a hlawh chhuak ve bawk.

Aizawl pawn aṭanga PVL team awmchhun Tuichangral hian league match nga an khelhah vawi thum hnehna changin, point kua an hmu. TNT nen an point hmuh zat inang mah se set an hloh hnem zawk a, table-ah palina an ni - final lut tur chuan league hmahruaitu Durtlang North an hneh a ngai dawn.

Mizo hlanga inlan ITI Vengin PVL an khelh vawi khatnaah beisei an phak lo. Volleyball ngaina veng team hian match nga an khelhah chak ni hmel an hmu lo a, tualchung player ṭha nei ve bawk mah se team dang el turin an lian tawk rih lo. An mahni ang thoa tualchhung player hlang chiah chhawr vetu TNT pawh an ngam lo.



Share this Post

Login to comment
No Comments