Zophaiah Mizoram police dah an ni

Mizoram sorkar chuan March 11, Pathian­ni zan aṭang khan Bairabi Zophaia MZP-te'n Zofate Chawlhbûk sak an tumna chheh­velah police a dah ṭan a, Bairabi-ah police a thawn belh bawk. Hetih lai hian, chief minister Lal Thanhawla chuan nimin khan Union Home minister Rajnath Singh hnenah lehkha thawnin, Assam police-te'n silai an hmet puak chu a dem thu a thlen.

Nimina Bairabi Zophai tlawhtu Zingṭian editor Zomuanpuia hnen aṭanga thu dawn danin, Zophaiah hian Mizoram IR police 100 chuang leh Assam police mi 200 vel an awm mek. Helai hmun hi nimin khan Assam DGP chuan a tlawh a, thil awm dan a enfiah.

Home minister R Lalzirliana chuan chief minister Lal Thanhawla duh dan angin, Mualvûm, Kawnpui aṭanga IR police awm sate bakah, Khawzawl leh Mamit aṭangin Pathianni zan khan IR police a tirh belh a; MAP-te pawh tirh thei ni tho mah se, ramri a nih avangin Governor thurâwn angin IR police tirh a ni.

Thuthar thehdarhtute hmaah chief minister Lal Thanhawla chuan, March 15, 2018 hmain state pahnihte DC level-ah an inbiak dawn thu a sawi a, "A ṭul a nih chuan a aia sangah pawh inbiak zel a ni ang. A ṭul leh ṭul loh a zir a ni mai," a ti.

Chief Minister chuan, tun hnaia thil thleng chu inchirhthehna atan hman ni lo se a duh thu sawiin, "Ram hnuk thilah chuan ṭanrual a ngai," a ti a; inchirhtheh zel a nih chuan Mizoramin zuam a hlawh zel tur thu a sawi.

Hetih lai hian, Congress Legislature Party (CLP)-te Pathianni zana CMO conference hall-a ṭhukhawm chuan resolution an pass a, 'Mizoram chhung, Pu Ch. Chhunga rama Zofate Chawlhbuk sak tumna hmun hi zanin la la hian Mizoram police-in luah nghal se CLP chuan a duh a. Zofate Chawlhbuk hi sak a nih ngei theihna atan sorkarin hma la zui nghal se' an ti a ni.



Share this Post

Login to comment
No Comments