Zanin dar 1:15-ah United vs Sevilla

Manchester United-in Old Trafford-ah an hmelma Liverpool an hneh avanga an phur vanglai takin zanin dar 1:15 hian UEFA Champions League second leg khel turin Sevilla an mikhual dawn. 

Jose Mourinho hote hian Ramon Sanchez Pizjuan-ah goal an khung thei lo a, English club tan hna a harsat phah dawn. Old Trafford-ah Spanish club-in goal an khung a nih chuan United-in a aia tam zela an thungrulh a ṭul ang.

Pogba tel loin?

United player zinga manto ber Paul Pogba chuan inhliam vangin Liverpool a hmachhawn ve lo a, French midfielder dam hun tur a la hriat loh.

Kum 55 mi Mourinho chuan, "Liverpool nen kan inkhelh hma training zawh dawnah a inhliam a, minute khat pawhin zo hma ila a dam ṭha ang. A inhliam chen tur hi ka hre lo," tiin a sawi a, Sevilla nen Pogba hi a khel thei lo tihna erawh a la ni lo.

United boss tana buaina tur erawh French midfielder awm loh lang khawpin Scott McTominay-a'n a hmunruak a luah khat hneh a, midfield kulhpui Nemanja Matic nen an inkawp rem bawk. Pogba hi a dam hman a nih pawhin khelhna hmun chan a awlsam lo ang.

Goal a pawimawh

First leg khelh a nih hma khan Sevilla manager Vincenzo Montella chuan, "Sanchez hi Italy-a a khelh lai aṭang tawh khan ka hria a, ani dang tur chuan rum deuh taka kan chet a ṭul dawn a ni," tiin a sawi lawk.

Amaherawhchu Alexis Sanchez hi beisei angin United goal nawr kawngah a la che ṭha tawk lo a, chutihrualin United-in January transfer-a an lak chhan tak chu Champions League nomawi an duh vangah a ngaih theih a, Chilean forward tan zanin hi hming chher hun a ni ang.

United tana thu lawmawm erawh Marcus Rashford-a'n hun rei tak inkhel bul a ṭan loh hnuah Liverpool lakah bul ṭanin goal hnih a khung a, striker palian Romelu Lukaku chet ṭhat lai a ni bawk a, goal luh leh luh lohah Mourinho 'game plan' in kawngro a su ang.

Sevilla lam

Vincenzo Montella hoten an mualah United chelh theih mah se Atletico Madrid lakah 5-1 in an mualpho zui a, kartawp khan Valencia lakah 2-0 in an tlawm bawk. Amaherawhchu heng match pahnih inkarah hian Malaga (1-0) leh Athletic Bilbao (2-0) te an hneh.

Italian manager Montella hian La Liga a ngaih pawimawh tel avangin Valencia an hmachhawn ṭum pawh hian United nen an inkhelh ṭum aṭangin inkhel bul ṭantu pahnih Manchester City winger hlui Jesus Navas leh Argentine Joaquin Correa te chiah a thlak danglam a, an chak loh zui avangin United hmachhawn turin inpuahchahna an nei ṭha lo a tih theih.

Chutihrualin Sevilla hian Premier League-a khel tawh Steven N'Zonzi, Jesús Navas, Nolito, Daniel Carrico, Sandro Ramírez leh Roque Mesa te an kawl a, heng player-te hian Old Trafford boruak an tem tawh a, inkhel pawimawhah an tawnhriat a pawimawh ang. 

Spanish club hi an muala goal an chhuah loh avangin dinhmun ṭha zawkah an ding a, United-in David de Gea nei lo se tun aia dinhmun ṭha lehzual tur an ni. Sevilla-in an la thlen ngai loh quarterfinal thlen an tum a nih chuan keeper De Gea an sut tlang theih a ṭul ang. 

Thih leh dam inkar!

FC Porto leh Inter Milan a enkawl laia Champions League nomawi chawi tawh Jose Mourinho-a'n champion dan hmang a hria a, Europe inelna sang ber a ngai pawimawh tih pawh a thusawi hmangin a lantir.

United boss Mourinho chuan, "Liverpool nena kan inkhel kha chu Liverpool an nih miau avangin inkhel lian a ni a, palina ni pha tura kan elpui an nih bawk avangin a pawimawh a, amaherawhchu kan result-in engmah a tichiang lo. Liverpool nena kan inkhel aia pawimawh zawk chu Sevilla leh Brighton nena kan inkhel tur zawk hi a ni," tiin nomawi chawi theih tur inelna a ngai pawimawh.

Portuguese manager chuan sawi chhunzawmin, "Sevilla nena kan inkhel tur hi thih leh dam inkar a ni a, Brighton pawh thih leh dam inkar tho a ni. Chelsea, Arsenal, Tottenham leh Liverpool te kan hneh tawh a, a sang paruk zingah chuan Man City chauh kan la hneh lo. Amaherawhchu Sevilla hi kan hneh lo a nih chuan kan thil tih ṭhat zawng zawng hi theihnghilhin a awm dawn tih hi ka hmu lawk a ni," tiin inkhelh apianga result ṭha hlawhchhuah a ṭul thu a sawi.

Manchester United hian Sevilla hneh turin goal khung ngei an mamawh a, zanin inkhelah hian hun pangngaiah goal a lut lo a nih chuan penalty shootout hmangin chak zawk zawn tur a ni. United hian Inrinni zan dar 1:15 hian Brighton & Hove Albion nen FA Cup quarterfinal an khel ang.



Share this Post

Login to comment
No Comments