World number 109 lakah Djokovic a tlawm

Novak Djokovic chu BNP Paribas Open aṭangin vuak tlak nghal a ni a. Grand Slam vawi 12 champion tawh Djokovic hi world number 109 Taro Daniel lakah a chak lo.

Pathianni zan Indian Wells-a inkhelah Serbian tlangval Djokovic hi Japanese player Daniel hmaah hian 7-6 (7-3), 4-6, 6-1 in a tlawm. Hliam vanga season hmasa chawhnu lam zawng inkhel lo Djokovic hi February thla kha a khiu zai a ni a, a rawn kir lehna hmasaah beisei a phak rih lo hle.

World number 1 hlui Djokovic hneh turin Daniel hian darkar hnih leh a chanve ngawt hun a hmang. Djokovic-a'n tihsual a ngah, unforced errors vawi 61 ngawt a nei a, tennis a khelh hun chhungin world number 100 hnuai lam player lakah vawi nga a chak lohna chiah a ni.

Inkhel dangah Roger Federer chuan Federico Delbonis lakah 6-3, 7-6 (8-6) in hnehna a chang. World number 1 Federer te hi Inrinni zan khan set hnihnaah 2-2 a nih laiin ruah sur vangin an khel zui thei lo a, Pathianni khan an chhunzawm leh a ni.



Share this Post

Login to comment
No Comments