Laipui a puak ring

Mipui 59,867 ṭut lenna Emirates Stadium-ah mipui an thawl hle a, Arsenal-in result an neih ṭhat hleihtheih loh vangin season ticket holder pawh an kal ṭha lo.

Fans lamin phurna an neih tlem tawh viau laiin Pathianni zan khan Gunners hian an mikhual Watford chu 3-0 in an hneh. January thla a lakluh thar Pierre-Emerick Aubameyang leh Henrikh Mkhitaryan ten goal an khung bakah an insiamsak tawn, defender Shkodran Mustafi chuan goal hmahruai a tauh lut bawk.

Petr Cech-a'n Watford captain Troy Deeney-a penalty pet a dan sak a, Chelsea keeper hlui hian Premier League bikah clean sheet vawi 200 a nei tling chiah - record nei ṭha ber a ni.

Gunners hian point 48 hmuin parukna an ni mek, Champions League khel thei dinhmuna awm Liverpool aiin point 12 in an hniam zawk. League match khelh tur pariat bak an neih tawh loh avangin palina nih tum aiin Europa League champion chu UCL ticket neih theihna tur awlsam zawk niin a lang.

Arsene Wenger-a naute hian kar hmasa khan AC Milan chu 2-0 in an luhchhuah tawh bawk a, a zawnin hnehna an chang a ni satliah lo, goal an chhuah lo. Ningani zan hian Emirates Stadium-ah Italian club hlun hi an lo mikhual ve leh thung dawn. 



Share this Post

Login to comment
No Comments