Fiorentina-in club captain an thlah

Davide Astori thih hnua a vawi khat nan Fiorentina chuan Pathianni zan khan an match hmasa ber an khel a, Victor Hugo goal hmangin Benevento 1-0 in an hneh.

Viola-in an club captain Davide Astori thlahna hun an hmang a, ngai awh tur chuan an hun la mamawh rei dawn tih a lang. Kum 31 mi Astori hi March 4 khan a thlenna hotel-ah a mu hlum a, he thihna vang hian Fiorentina leh Udinese inkhel tur bakah Serie A inkhel dang khelh hun sawn a ni.

Stadio Artemio Franchi-ah Fiorentina player-te'n Astori leh jersey number 13 chuanna jersey an ha chhuak a, an naupang hruaite jersey-ah pawh hei tho hi a chuang. Astori thlahna banner ṭhanem tak hmuh tur a awm a, 'Florence khawpui mittui hian helai hmun leh chatuan ram a thlun zawm. Captain, tluang takin le' tih chu a langsar zinga mi a ni.

Fiorentina chuan an captain nghilhloh nan a jersey number 13 chu tumah hak tawh lo turin an dah ṭha a, Pathiannia inkhelhah pawh hian minute 13-naah an chawl a, 'Davide 13' tih chu mipuiin mawi fahranin an pholang. Minute 25-naa Vitor Hugo-a'n goal a khung hian, Astori lem chuanna T-shirt chu midang pawh parhtirin sipai chibai buk hmangin zahna a lantir.

Hun tawp rualin player-te chu khelmualah tlu sawp nghalin mittui a sur. Fiorentina midfielder Marco Benassi chuan, "Chung lam aṭanga min thlirtu Davide pawh kan khelh danah a lawm ang. Victor Hugo-a'n goal khung tura sang taka zuan theih chhan kha a puih vang a nih ka ring tlat a, Davide hi kan zingah a la cheng reng a ni," tiin a sawi.



Share this Post

Login to comment
No Comments