Kane aiawhtu Son Heung-min

Goal an phurh hnuah hliam vangin Harry Kane lak chhuah a ni a, dinhmun harsat taka an awm laia Tottenham Hotspur mamawh chhanna chu Son Heung-min a ni.

Pathianni zan Premier League inkhelah Spurs hian khualmualah Bournemouth 4-1 in an luhchhuah, Juventus hneh loa Champions League aṭanga tla hlim Mauricio Pochettino naute tan thawh lehna duhawm tak a ni. Point 61 hmuin table-ah pathumna an ni a, palina Liverpool aiin point khatin an sang zawk.

Goal leh hliam

Taksa chak lohna vangin Ben Davies a inlan lo a, Spurs tlarhnung sirah Danny Rose chu kumina a vawi khat nan inkhel bul ṭantir a ni. England international hi a tir lamah a tal buai, mual sirah Lys Mousset an ven hneh loh avangin a cross ball chu Junior Stanislas-a'n goal bar a tih per nghal dawp.

Spurs tlarhnung a buai a, midfielder Stanislas dan reng theih a ni lo; box chhunga vengtu nei loa a awm hnuah Stanislas hian minute sarihna lekah goal hmahruai a khung - keeper Hugo Lloris tan dan hman a ni lo.

Christian Eriksen-a through ball dawngtu Kane-a'n an siphurh a sut. Mahse, England interantional striker hi a offside vangin pawm a ni lo. Kane hian a ke rekah hliam a tawk zui a, minute 29-na lekah lak chhuah a ni.

Tun season chhunga goal 36 khung tawhtu Kane hi tun hmain a ke rekah hian vawi hnih hliam a tawk tawh bawk a, a chawlh chen tur la chiang lo mah se kar thum vel tal a chawlh a ngaih rin a ni. Kar tawpa Swansea nen FA Cup quarterfinal an khelh hunah a inlan thei lo nghal ang.

Thawhlehna

Khualmualah Tottenham-in goal an phur a, an thiampuipa Kane lakchhuah a nih tak bawk avangin talbuai thei dinhmunah an ding. Mahse, Kane a chhuah aṭanga minute khat hnu lekah Spurs tan midfielder Dele Alli chuan an si phurh a sut.

First half-ah goal a lut zui lo a, second half-ah pawh goal dang hmuh tur a awm mai lo. Denmark international Eriksen-a'n hun ṭha a hlah hnuah Son chuan hnai tak aṭangin a pet goal. South Korean forward hian Cherries defender leh keeper Asmir Begovic bum nan ball a pet sawt lut.

Eddie Howe nauten Callum Wilson hmangin minute 84-naah si phurh an sutah an inngai. Mahse, referee Mike Dean chuan goal an khung hma hian ball kang an inchuhna lamah Spurs defender Davinson Sanchez chu an nem nia ngaiin a pawm sak lo.

Bournemouth an buai zui laiin Spurs lamin an nawr let thut, an goal hnihna khungtu Son-a'n fal taka ball tlan tlang puiin keeper Begovic thlengin a bum tlang a, goal thumna a khung - hun tawp hma chiahin Serge Aurier chuan an goal lina a khung ve leh bawk.

Poch a lawm

Manager a nih hnua a naute vawi 150 hnehna champuitu Mauricio Pochettino chuan a naute thawh leh dan chuan a tih lawm thu a sawi. Spurs manager chuan, "Juventus kan hneh loh hnua inlan lehna hmasa ber atan chuan duhthusam a ni. Hei hian team chhungah phur tharna a siam ngei ang.

"Bournemouth kha an che rangin hmachhawn an harsa hle. Goal kan chhuah hma bawk, mahse dinhmun harsa taka kan awm lai khan huaisen takin kan bei let thei a ni," tiin a sawi. Poch hian Son chu khelh ṭha a tih thu a sawi tel a, chutih rualin season tluana pawimawh chu team anga chet ṭhat a nih thu a sawi bawk.

Bournemouth manager Eddie Howe chuan, "Inkhel bul kan ṭan fuh a, Spurs tan harsatna kan siam hnemin goal pawh kan khung. Kan chak loh chhanah ka naute kha dem theih an ni lo, khelmual chhungah khan an theihna zawng zawng an hlan a ni. Amaherawhchu, minute 80 chhung kan khel ṭha a, chumi hnuah min hneh chauh," tiin hun tawp lama an inthlahdah zeuh chu an tawrh thu a sawi.



Share this Post

Login to comment
No Comments