English player chhuah tam a ngai - Pep

Manchester City manager Pep Guardiola chuan England national team-in hmasawnna an neih theihna tur chuan player-te ram pawn lama an kal a pawimawh thu a sawi.

England hian kum 2006 World Cup squad-a David Beckham (2006) leh Owen Hargreaves (Bayern Munich) an neih hnuah inelna lianthama an squad-ah ram pawn club-a khel player an la nei leh lo.

Pep chuan tun hnaia Spain hlawhtlinna chhan pakhat chu an ram pela an khelhchhuah vang a nih thu sawiin, "Premier League aṭanga Spain national team-a an rawn kir chuan player ṭha zawk an ni ṭhin. 

"Ram pawna an khelh hian Spanish football tan hna ṭha tak an thawk tihna a ni. England player-te pawh kal chhuak ve se, chu chuan ram team a pui em em ang. Ram danga inkhelh hi tawnhriat ngah nan leh thil a tak taka zir nan a ṭha a ni," a ti.

Tun dinhmunah European top five league-a inlan English rawlthar tlem an awm a, Jadon Sancho chuan Borussia Dortmund tana khel mekin Everton winger Ademola Lookman chu RB Leipzig-ah loan-in a khel mek a, West Ham defender Reece Oxford chu Borussia Monchengladbach-ah loan-in a khel bawk.

Guardiola chuan Premier League-a hlawh tam lutuk chu player tam zawkin ram pawna chhuah an hreh phah chhanah a ngai bawk. Kum 47 mi manager chuan, "Premier League-ah chuan sum a tam a, player-te pawhin chhuahsan an hreh a ni mahna," a ti.

Barcelona boss hlui chuan Under 23 league tih chak zawk a pawimawh thu sawi nghalin, "Ka mimal ngaihdanah chuan second team hi tih chak lehzual an ngai a, chu chuan English national team a pui ang," tiin a sawi.



Share this Post

Login to comment
No Comments