Juve-in Napoli kalsan

Italian champion Juventus chuan an nomawi kawl lai humhim thei turin an dinhmun an siamṭha leh ta. Pathianni zan Serie A inkhelah Juve hian Udinese 2-0 in an hneh a, an elpui Napoli erawh Inter Milan nen goal awm loin an inhnehtawk thung.

Old Lady hian league match 27 khelh aṭanga point 71 hmuin hmahruaitu an ni leh tawh a, anmahni aia match khata khel hnem zawk Napoli aiin point khatin an sang zawk - Juve hian an khelh hmabakah hnehna an chang leh thei a nih chuan an dinhmun a ṭha zual hle dawn.

Dybala bawk

Season tir lamah Juventus tan Paulo Dybala a che ṭha hle a, season laihawl laiin reh deuh mah se an mamawh hunah tak a rawn inlar leh ta. Argentine forward hian Udinese lakah goal hnih a khung a, ram tana a khelh pui Gonzalo Higuain-a'n penalty a hlah thung.

Dybala hian Lazio an hnehna goal awmchhun a khung tawh a, Champions League aṭanga Tottenham an pet chhuah ṭumin chakna goal a khung bawk - tun hnaia match hnuhnung pathumah goal li a khung leh tawh.

Tun season inelna hrang hranga goal 19 khung tawh Dybala chuan, "Tottenham lakah dinhmun hniam zawka kan din hnuah harsa takin hnehna kan chang let thei a, chumi hnuah rim taka kan khelh hnuah hnehna kan chang leh thei hi a lawmawm hle. Kan khingpui kan nawr na thei em em a, goal khung tu a ka ṭang thei hi ka lawm," tiin a sawi.

Napoli an chelh

Kum 1990 hnua a vawi khat nana Serie A champion nih tum Napoli chuan San Siro-ah goal an khung thei lo a, pangana dinhmun luahtu Inter Milan nen point khat ve ve an insem.

Inter coach Luciano Spalletti chuan, "Season bul kan ṭan ṭhat hle rualin kan hnungtawlh duai hman, tunah erawh huaisen takin kan khel leh thei tawh. Keini aiin Napoli kha an ṭha zawk tih phat tur a awm lo, chutih rualin point kan hmu hi a lawmawm," a ti.

Inter Milan lamin point an hmuh avanga an lawm laiin, Napoli coach Maurizio Sarri erawhin a duh ang zat point a hmu lo. Sarri chuan, "Season tawp thleng 100%-in kan bei tur a ni. Ka naute kha an rilru a huaisen a, a tawp thlengin kan bei chhunzawm ang," tiin a sawi.

Sarri chuan beisei an la neih thu sawi zuiin, "Juventus hi European team lian leh ṭha an ni a, heti chung hian nomawi inchuh boruak a la awm. Spain, Germany, England leh France-ah te chuan league champion tur a chiang der tawh," tiin a sawi.



Share this Post

Login to comment
No Comments