Zaninah final lut tur pakhat

Chennaiyin FC leh FC Goa te chuan zanin dar 8:00-ah semifinal second leg an khel ve leh dawn a, inkhel hmasa zawkah team pahnih hi 1-1 in an inhnehtawk.

Zanina team pahnih inhmachhawnna tur hmun hi Chennaiyin khelmual a ni a, khualmuala goal khungtu Chennai club chu dinhmun ṭha zawk an ni rih. 

Inkhel hmasa zawkah Chennaiyin tan player pawimawh pahnih Jeje Lalpekhlua leh Jerry Lalrinzuala ten inkhel bul an ṭan ve ve a, zaninah pawh inkhel bul ṭan tura beisei an ni. 

FC Goa coach Sergio Lobera chuan, "Hnehna chang turin Chennai khawpui kan pan dawn. Goal khung uar tak team kan ni a, Chennaiyin khelmual a nih tak avanga goal kan khung theih lohna chhan tur ka hre lo," a ti.

Goan club hian league round-ah ringawt goal 42 khungin goal khung hnem ber an ni a, anmahni hnaih bertu Bengaluru pawhin goal 35 bak an khung lo - goal 18 khung tawh Ferran Corominas leh goal 13 khungtu Manuel Lanzarote an nei.

FC Goa-in goal an khung theih laiin Chennaiyin erawh tlarhnung phui ṭhat vanga hming ṭha an ni thung a, league round match 18-a goal 19 chiah chhuahtu team tan final lut turin Goan club laka goal chhuah loh a tawk ang.



Share this Post

Login to comment
No Comments