Pune ngam loh Sunil Chhetri

Bengaluru FC-in Indian Super League-a an season hmasa berah final an lut nghal a, Bangalore club hlimna thlentu chu ṭum dang ang bawkin Sunil Chhetri niin hattrick a siam.

Pathianni zan khan Bengaluru hian ISL semifinal second leg-ah Pune City chu 3-1 in an lo sawp a, inkhel hmasaah goal khung loa an inhnehtawk tawh avangin South Indian club an tlang. 

Zanin dar 8:00-ah Chennaiyin FC leh FC Goa ten semifinal second leg an khel ve dawn bawk a, ISL nomawi chawi tura Bengaluru hmachhawn tur zaninah a chiang dawn. 

Inkhel hmuhnawm

Bengaluru-a inkhelah team pahnih goal khung tumin an innawr nghal a, a hmuhnawm. Bangalore club tan minute thumna lekah Udanta Singh ball siamsak hmangin Chhetri-a'n chance nei nghal mah se goal-ah erawh a chantir thei lo a, minute hnih hnu lawkah Pune tan Diego Carlos-a'n a chance neih a hlah chhunzawm ve bawk. 

Pune-in goal khung tumin na takin an nawr a, goal khung hmasa zawktu erawh Bengaluru an ni. Maharashtra club tana Marko Stankovic-a'n a chance neih a hlah hnuah Sunil Chhetri a inlar a, India captain hian Udanta Singh hnen aṭanga a ball hmuh chu goal hmahruai ni turin a tauh lut - Chhetri-a'n chance neih chhunzawm mah se chawlhlawk hmain a goal hnihna erawh a khung thei lo. 

Second half-ah Udanta-a'n a chance neih a hlah hnuin penalty box-ah Chhetri tih tluk a ni a, India captain hian ama penalty hlawhchhuah hi mawi zetin a 'chip' lut. Pune tan Jonatan Lucca-a'n freekick hmangin mawi zetin an si phurh sut ṭhen mah se Pune beiseina Chhetri bawkin a tih mih sak a, hun tawp nan minute khat chiah a awm tawh tihin a goal thumna a khung. 

A hming chu Chhetri

Indian player ropui sawi an nih apiangin Sunil Chhetri hming lam tel a ni tawh ṭhin ang. India tan match 97 a khelh aṭanga goal 56 khung chunga ram tana goal khung hnem ber ni thei striker hian a hunah tak ram leh club tan a theihna a pholang ṭhin. 

'Big game player' tih huang chhunga dah ngam striker hian ram tan pawh 2008 AFC Challenge Cup final-ah khan Tajikistan lamah hattrick siamin India a champion pui a, kum 24 hnuah a vawi khat nan India-in Asian Cup an khelh theih phah. Kum 2016  AFC Cup final lut tura Bengaluru-in Johor Darul Ta'zim an hnehnaah goal a khung bawk - boruak sangah a talbuai ve ngai lo.

Bengaluru coach Albert Roca chuan, "Chhetri chungchangah enge ka sawi ang? Player ṭha chungchuang bik a ni a, a ṭhatzia sawi turin thuin a daih lo. Game pawimawh tak kan khel a, mamawh hunah a ṭangkaizia a pholang a ni," a ti. Chhetri hian match 20 aṭangin goal 13 a khung tawh a, Indian player zinga amah hnaih bertu Jeje Lalpekhlua'n goal sarih a khung tawh thung.

Chhetri fakna!

Semifinal boruak sangah Chhetri-a'n hattrick a siam miau a, Pune City coach Ranko Popovic pawhin Indian striker fak nan ṭawngkam ṭha a ui lo. Serbian coach, "Vawiin thleng chuan Chhetri hi Indian player ṭha ber a ni a, ani ang player hi chuan boruak sang tak hnuaiah pawh khelh dan an hre ṭhin a ni. 

"Hattrick a siam a, zaninah chuan a changtupa ber a ni. Player naupang zawkte pawh Chhetri aṭang hian in zir rawh se. Season tharah chuan ani anga goal thum khung thei hi kan neihve a ngai a ni. Bengaluru khan chak an phu a, final khelh an phu a ni," a ti.

Bengaluru coach Roca chuan, "Game hautak a ni a, vawiina hnehna kan chan hi Chhetri thawhrah bik chauh ni loin team pumpui thawhrah a ni. Kan season hmasa berah final kan lut a, tunah chuan hmabak pakhat chauh kan nei ta," a ti a, nomawi chawi ngei an tum thu a sawi bawk.

Pune tan Isaac

ISL semifinal first leg-ah Isaac Vanmalsawma inlan mah se Hnahthial rawlthar hi substitute bench aṭanga tlan luhtir a ni a, Sree Kanteerava Stadium, Bengaluru-a inkhel entu mipui 24,214 hmaah erawh Mizo rawlthar hian inkhel bul a ṭan.

Isaac-a'n a chance neihah ṭha takin a khel a, inkhel boruak sang karah Shillong Lajong midfielder hlui hi Emerging Player of the Match-ah thlan a ni. Lalchhuanmawia Fanai chu bench-ah dah a ni a, Lengpui tlangval hi hliam damkawr a nih avangin khelmualah erawh a inlan lo. 

Bengaluru squad-ah Mizoram player Lalthuammawia Ralte leh Zohmingliana Ralte awm mah se khelmualah tlan luhtir an ni lo bawk - ISL final hi March 17 zanah khelh tur a ni ang. 



Share this Post

Login to comment
No Comments