Tlai dar 4:00-ah NM Gupta Final Mizoram Vs Army Green

32nd Capt NM Gupta Trophy final-ah Mizoram chuan vawiin tlai dar 4 hian nikum final-a an hneh tawh Army Green nen Satindra Mohan Dev Stadium, Silchar-ah an inhmachhawn dawn. 

Mizo Vs Mizo

Army Green hi Samthang tlangval PC Lallawmkima hnuaiah an khel a, Mizo dang pathum Isaac VL Ruatkima (Ruantlang), Lalramsanga Hauhnar (Zemabawk North) leh PC Lalfakawma (Bethlehem Vengthlang) te an awm.

Final thleng turin Army Green hian goal 15 an khung tawh a, captain PC-a leh Chanmari FC tan pawha khel tawh Isaac-a ten goal hnih ve ve an khung tawh. BVT tlangval Fakawma hi inhliam vangin match khat chiah a la inlan a, Zemabawk North tlangval Ramsanga hian midfield laiah hmun pawimawh a chang.

Army Green player-te'n fitness an nei ṭha a, Mizoram tan chetsual theihna tur an ni a, champion lai tan ngaih ṭha taka awm theih a la ni lo.

Army Green chu

Santosh Trophy hnuhnung pangaah Services vawi thum an champion a, Army (Red leh Green), Air Force leh Navy aṭangin player an la khawm ṭhin. Kuminah erawh Services hian final round an thleng pha lo a, chu team-ah chuan Army Green hian player pali striker PC-a, winger Nanish Singh, right back Zanje leh keeper Sarat te an tel a.

Army Green hi Army Red aia dah hniam zawk ni mah se tun hnaiah erawh Green hian Red hi an hneh ngun zawk a, army team ṭha zawka sawi theih an ni. Services-ah player awm khawm hun chhung a rei loh avangin an inhre chiang tawk lo a, Army Green erawh kum tluana awm ho a nih avangin team chhung an inhre chiang zawk.

NM Gupta-ah pawh Army Green hian match hmasa pathum an chak vek a, semifinal an luh chian hnuah ASEB nen goal awm loin an inhnehtawk. Mizoram tan final luh theih nana ARC lama hattrick siamtu Bikash Thapa ven uluk a a ngai, Army Green striker hian goal nga a khung tawh.

Army Green hian final lut turin Bihar Regiment (2-0), Sikh Regiment (1-0), Cosmos, Bangladesh (9-0), ASEB (0-0) leh ARC (3-1) te an hmachhawn a, goal khat chiah an la chhuah.

Mizoram ve thung

Mizoramin semifinal-a hnawhchhuah Lalmuanzova an chhawr thei dawn lo a, hliam leh dam lohna vangin Ṭhasiama leh K. Lalnunzama te an khel thei dawn lo. Hei bakah hian winger ṭha Vanlalbiaa Chhangte chuan I League hmahruaitu Minerva Punjab a zawm dawn avangin Mizoram team hi a chhuahsan tawh bawk.

Coach Lalsangzuala Hmar chuan, "Inelna ṭan hmain midfielder pahnih Jacob leh Rinchhana te zirna vangin kan chan a, inhliam vangin Ramdina kan chan leh a, Valtea leh Ṭhasiama te final-ah kan chhawr thei dawn lo. Mabiaa'n I League club min zawm san bawk avangin kan khelh dan pawh  kan thlak a ṭul ang," tiin Vanglaini a hrilh.

Mizoram tana thu lawmawm erawh Aizawl FC-in an forward Lalruatfela Zote an chhuah phal a, Republic Vengthlang tlangval hi amah hrechiangtu coach Sanga hnuaiah semifinal-ah inlan chuan game tidanglam thei a la ni reng.

Sanga chuan, "Fela Zote te hi chuan tawnhriat an nei ṭha tawh a, a fitness a ṭha tawk lo chung pawhin a la ṭangkai reng a ni. Amaherawhchu kan training a zawm har avangin inkhel bul a ṭan dawn lo," tiin a sawi.

Mizoram hian goal nawr nan Lalremruata, MC Malsawmzuala, MS Dawngliana, Lalromawia leh Lalrammawia te an nei a, final kalkawngah match nga NF Railway (3-2), ARC (2-0). DGAR (6-0), Arunachal SS (3-0) leh ASEB (1-0) khelin goal an la khung vek a, hnehna an chang vek bawk. 



Share this Post

Login to comment
No Comments