Zaninah futsal semifinal thawh khatna

RFL Plastics MFA Futsal League semifinal first leg chu zanin hian R. Dengṭhuama Multipurpose Hall, Mualpuiah khelh a ni dawn. Zanin dar 7:00 hian Chanmari leh Durtlang te an inkhel ang a, darkar khat leh a chanve hnuah Chhinga Veng leh Saron Veng te an inhmachhawn zui ang. Semifinal second leg hi February 16, Zirtawpnia khelh tur a ni.

Chanmari an lian

Chanmari hian champion tumin player an lalut a, futsal league khelh meka squad nei chhah ber an ni. Semifinal-ah Dinthar an hneh ṭuma khel thei lo B. Zoramthara, Vanneihtluanga leh Rosangliana te an chhawr leh thei dawn a, goal 11 khung tawh David Laltlansanga bakah MPL player ṭha Lalbiaknia (9 goals), Rochhingpuia (6), Reuben Zosangpuia (4), Samuel Laltlanthanga (5) leh Lalrammuanpuia (3) te an kawl a, final thleng tura ngaih an ni.

Durtlang erawhin an player ṭha pahnih Francis Zonuntluanga leh Lalliansanga (Notea) te an chan tawh a, chutichung chuan semifinal an thleng thei. Zanin hian an club top scorer goal 10 khung tawh Lalfelkima chu Aizawl FC junior team tana a zinchhuah avangin an hmang thei dawn lo a, fiahna hautak zawk an hmachhawn dawn.

Amaherawhchu, Durtlang hian keeper Lalhruaizela an nei a, hei hi an chakna hnar a ni. An keeper neih ṭhat hmang ṭangkaiin quarterfinal-ah Electric Veng an hneh thei a, chutihrualin penalty shootout thleng nawn tur chuan tlarhnung rem phui ṭhat a ṭul ang.

Nomawi leh Chhinga Veng

Chhinga Veng hian MPL nomawi an kawl a, MFA Futsal League hi chona thar a ni. Group stage-ah Chhinga Veng hian Saron Veng hi 5-2 in an hneh tawh a, final an thlen mai a rinawm. Chhinga Veng hian football thiamna futsal-a hmang ṭangkai thiam tak Lalsawmzela (9 goals), Vanlalhriata (9) leh C. Lalmuanpuia (5) te an nei a, zanin pawh hian heng player pathum hi an goal nawrna tur ber an ni leh ang.

Amaherawhchu Saron Veng manager Rothlamuana Ralte chuan, "Kan khelh chhiat ni an tawng fuh a, chak tur a chiang lo, eng pawh a thleng thei a ni," tiin Vanglaini a hrilh thung. Saron tan Lalremtluanga'n goal 16 a khung tawh a, Marema hi chak pui tham niin goal 9 khung tawhtu K. Lalhmangaihkima nen an pawimawh ang.



Share this Post

Login to comment
No Comments