Champions League Juventus nge Spurs lian zawk dawn?

Europe-a club inelna ngaihhlut ber Champions League last 16 chu zaninah khelh a ni dawn ta - match hmasa ber aṭangin mit a tlai nghal dawn a, zan dar 1:15 hian Juventus-in Tottenham Hotspur an mikhual ang. 

Sulhnu leh tawnhriat aṭanga teh tur a nih chuan Spurs aiin Juventus an chungnung nghal - mah se Spurs boss Mauricio Pochettino tehna erawh a dang thung. Argentine manager chuan, "Arsenal emaw Manchester United i hneh a nih chuan Europe-a club lian ber ber hmachhawn turin i inpeih tihna a ni," a ti.

Spurs boss thusawi hi hnualsuat ngawt theih a ni lo - London club hian Premier League-a an match hnuhnung pathumah a zawnin United (2-0), Liverpool (2-2)leh Arsenal (1-0) an hmachhawn a, Reds lakah chiah hnehna an chang zo lo - zaninah inrintawkna nen Turin an pan ang.

Inang lo

Europe-a team pahnih sulhnu khaikhin chuan an in thlau hle - Juventus-in tun hnai season thumah vawi hnih Champions League final an lut thei a, Spurs tan CL-a an vawi thum inlanna chauh a ni thung.

European Cup hming a put laiin Spurs-in semifinal an thleng tawh a, Champions League tih a nih hnuah 2010-11 season-ah quarterfinal an thleng a, an tawn san ber ṭum a ni - tun season-ah record thar ziah an duh ang.

Juventus-in Champions League nomawi vawi hnih an chawi tawh a, tun hnaia final an luha an ngam loh erawh Spanish club pahnih Barcelona leh Real Madrid an ni. Serie A-ah season ruk a zawnin an champion tawh a, 'Champions League' hi an mu 'tan' awmchhun a ni rih.

Tawnhriat aiah rinna

Mi tam zawkin Spurs lakah an rinna an nghat ngam lo a ni mai thei. Mahse, London Hmar Veng club hian Group H-ah hmahruaitu nichunga last 16 lut turin Real Madrid leh Borussia Dortmund an hnuaichhiah tih hriat tel sak a ṭha - point 18 aṭangin 16 an hlawh chhuak.

Spurs boss Pochettino chuan, "Juventus hi team ṭha an nih thuah inhnialna tur a awm lo. Europe-a club ṭha ber zinga mi an ni a, player tawnhriat ngah tak tak, Champions League boruak sang hip ṭhang an kawl nual a, anni hi season thum chhunga CL final vawi hnih khel thei an ni"

"Keini chuan chutiang tawnhriat zawng zawng chu kan nei ve lo. Mahse, kan beiseina leh inrintawkna kan hmachhuan ang. Tun hnaiah kan khel ṭha em em a, Juve tana hna harsa siamsak turin theihtawp kan chhuah dawn a ni," a ti.

Fimkhur a ṭul

Thawnthu hlui keuin tawnhriatah Juventus ropui zawk mah se Turin club manager Massimiliano Allegri erawh a ṭawng uang duh lo. Italian manager chuan, "Quarterfinal luh ngei kan duh a, mah se kan fimkhur a ṭul dawn a ni, " a ti.

Kum 50 mi manager chuan sawi zawmin, "Spurs hian khelh dan phung ṭha tak an nei a, kan inhmachhawnna tur hi Champions League a nih bawk avangin a harsa ang. Ṭum dang zawng aia kan khelh ṭhat a ṭul dawn a ni," a ti a, Spurs a en nau duh lo.

Club pahnih hi competitive match-ah an la inhmachhawn ngai lo a, tun season ṭan hma khan pre-season friendly-ah an intawng thung - Wembley-a inkhelah hian Spurs 2-0 in an chak.

Player khaikhinna

Spurs-in tlarhmaa an hmachhuan tur chu match 33-a goal 32 khung tawh Harry Kane bawk a ni leh dawn a, English striker thlawp tur hian Dele Alli, Son Heung-min leh Christian Eriksen an la awm cheu - Giorgio Chiellini hoin Juve tlarhnung tan inven a ṭul ang.

Poch-a'n, "Khawvela player ṭha ber zinga mi a ni," tia a sawi Paulo Dybala dinhmun a la chiang lo a, Juve forward hian hliam vangin an match hnuhnung bera Fiorentina an hneh ṭumin a hmel a la lan lo. Allegri chuan a player hi a dam hman a beisei thu a sawi rualin 'risk' lak a tum loh thu a sawi tel.

Dybala inlan lo pawh ni se Juve-in Gonzalo Higuain leh Mario Mandzukic an la nei cheu a, Spurs tlarhnunga Jan Vertonghen leh Ben Davies te tan thlamuanna thuchah ngaihthlak a la hun lo.



Share this Post

Login to comment
No Comments