Chelsea leh Arsenal inhnehtawk

Antonio Conte-a'n Chelsea leh an mikhual Arsenal te goal awm loa an inhnehtawk hnuah video assistant referee (VAR) a thlawp thu a sawi a, sawi zui hlawh tak pakhat chu Arsene Wenger-a'n bench lama forward Alexis Sanchez a ṭhuttir chu a ni bawk.

Nilaini zan Stamford Bridge-a League Cup semifinal first leg inkhelah Blues tan midfielder Cesc Fabregas leh Andreas Christensen ten holam taka an tauh luh loh bakah Arsenal goalkeeper David Ospina chuan Victor Moses leh Alvaro Morata te goal khung tur ṭha takin a dan sak bawk.

Arsenal tan striker Alexandre Lacazette chuan an hun ṭha bera ngaih a hmu, mahse Lyon hmatawng hlui hian goal kham chungah thlawh chhuakin a vannei tawk lo. January 24 hian Emirates Stadium-ah second leg khelh leh tur a nih avangin goal luh lohna inkhelah Gunners an lawm zawk rih ngei ang.

Hazard a dam

Chawn hliam vanga inlan thei lo tura ngaih Eden Hazard-a'n inkhel bul a ṭan thei a, Belgium international forward hi striker Morata thlawp tura dah a ni. N'Golo Kante leh Thibaut Courtois an awm bawk avangin Blues hian inrintawkna sang tak nen mikhual an dawngsawng a, inkhel pawh an thunun viau.

Amaherawhchu, FA Cup aṭanga tla hlim Arsenal tan tlarhnungah Shkodran Mustafi leh Calum Chambers te an dingkhawng tlat a, hmunawl an siamsak duh lo. Chelsea hian goal shot vawi 21 zet nei mah se clear chance tia sawi tur an hmu meuh lo, goal zawnah vawi ruk petin Colombia international Ospina chetṭhat ṭum an tawn avangin goal an khung lo.

Blues manager Conte chuan, "Kan dinhmun hi 50/50 a la ni. Kan khelmuala goal kan chhuah loh hi second leg atan a pawimawh thei tih kan hria, chutihrualin Emirates Stadium-a inkhelh hi a awlsam ngai lo tih kan hre bawk, mah se inkhel hautak hamchhawn turin kan inpeih," tiin a sawi.

Thutlukna mak!

Khup na vanga Mesut Ozil inlan theih loh zanah Sanchez chu bench-ah ṭhuttir a ni a, piancham lawmna lama a chet dan vanga Chelsea hmachhawn lo tura sawi Alex Iwobi chu minute 90 chhung khelh tir a ni leh thung si! Wenger-a thutlukna hian an khingpui bakah Arsenal fans  ngei pawh a barakhaih.

Manchester City pan tura sawi Sanchez chungchang sawiin Wenger chuan, "Inkhel tur thlan chungchang leh transfer hian inzawmna a nei lo a, team selection hi ka sawifiah ziah pawh a ngai hran lo. Janaury thla chhungin Alexis hi a chhuak dawn lo a, kan hnenah hun rei zawk awm turin ka duh," tiin a sawi.

Jack Wilshere-a'n tun hnaiah Arsenal match hnuhnung pakua zinga pasarihah inkhel bul a ṭan a, England interantional hi a hliam a dam tawh bakah inrintawkna a neih san leh tawh avangin Chelsea lakah captain armband hrentir a ni. 

Kum 26 mi Wilshere hi Gunners fans lamin an ngaina a, khelmual chhungah hotu a nih avangin tun hnaia a khel ṭha chho hi chanchin ṭha a ni. Mahse, tun hma lam pawha a buai fo tawhna angin minute 57-naah a ke rek hliam vangin lak chhuah a ni. Wenger chuan a midfielder hi a hliam nat loh a beisei thu leh rei lote hnuah a rawn kir a beisei thu a sawi.

VAR hmangin

Thawhṭanni zana Brighton leh Crystal Palace ten FA Cup an khelh ṭumin English football-ah a vawi khat nan VAR hman a ni a, League Cup semifinal-ah hman zui leh niin Chelsea leh Arsenal intawn ṭum hian referee Martin Atkinson chuan ṭum hnih VAR hi a be rawn a ni.

Chelsea wing back Moses-a'n box chhungah Arsenal winger Ainsley Maitland-Niles a ti tlu, hun tawp dawn lamah Danny Welbeck pawhin Gunners captain hlui Fabregas lakah penalty chawi hlauhthawnawm takin a che bawk; thil thleng pahnihah hian VAR hman a nih hnuah penalty pek an ni lo.

Blues manager Conte chuan, "VAR hman hi ṭha ka ti hle, inkhelah thultukna siam harsa leh rinhlelh theih deuh a awm changin ennawn a nih hnuah thutlukna dik leh ṭha ber an siam thei a ni," tiin a sawi. Conte hian VAR hman hnem dan azirin extra time pek dan pawh a danglam a ngaih a rin thu a sawi bawk.

Arsenal manager Wenger pawhin, "A bengvar thlak a, nghah vang vang hnua penalty pek kan nih erawh chuan a hrilhhai thlak duh deuh ngei ang. A pumpui thlir chuan thil ṭha tak a ni," a ti. Wenger hian VAR hman a nih chuan mitinin tihsual neih tlem an duh dawn a, a ṭhat a beisei thu a sawi tel.



Share this Post

Login to comment
No Comments