Mourinho nena buaina ka theihnghilh lo ang - Conte

Chelsea boss Antonio Conte chuan Blues manager hlui Jose Mourinho nena tun hnaia ṭawngkam hmanga an inbeihna chu engtikahmah a theihnghilh tawh loh tur thu a sawi a, manager pahnih inbeihna chu club pahnih inbeihna niloin an pahnih inkar a nih thu a sawi tel bawk. 

Manchester United boss Mourinho hian Chelsea lama a hmunruak luahtu Conte hi, "Mi ang lo ang maia khelmual sira khawsa ṭhin a ni," tiin uchuak taka an goal khung leh chak lawm ṭhinah a puh a, "Ka nunah hian match fixing vanga hrem ka ni ve ngai lo ang," tiin Italian manager hi a kap zui. 

Nghilh loh tur

Conte hian Mourinho-a'n a kahna hi chhangletin, "Pa rilru te leh hniam tak a ni," tiin Portuguese manager chu a huang chin pelah a lo puh tawh a, Thawhlehni khan news conference-ah a hriatreng tawh tur thu sawi zuiin, "Ṭawngkam na tak tak a hmang a, ka theihnghilh tawh lo ang," a ti. 

Juventus boss hlui chuan sawi chhunzawmin, "Tuna kan buaina hi chu club aṭanga lo chhuak a ni lo a, kan pahnih inkar a ni. Tunah chuan ka duhtawk tawh," tiin Mourinho nena an inbeihnaah chuan ṭawngkam neih chhunzawm a tum loh thu a sawi. 

Match fixing maw?

Italian football-ah match fixing a hluar a, an ṭan lam team chak tir tum luatah thamna sum an chelek ṭhin. Conte hian kum 2012-13 a Juventus a enkawl lai khan a club hlui Siena lama match fixing thleng chu thuneitute hnenah hre reng chungin a thlen lo tiin hremna a tawk a, match li chhung a club kaihhruai phal sak a ni lo. 

Mahse, kum 2016 khan Court chuan Conte hi thiam a chantir a, a club hlui Siena-a match fixing thleng chungchangah thiam lohna engmah a nei lo niin an tarlang. Mourinho-a'n match fixing a sawi chhuah chhan hi Conte chu mi ang lo maia chak lawm ṭhina a puh hnua Italian manager-in, "A hun kal tawhte kha a thlirkir ve ṭhain ka hria, ama chungchang a sawina pawh a ni mahna," tia a chhanlet vang a ni. 

Buaina chu

23 October, 2016: Chelsea-in 4-0 in Manchester United an sawp a, Stamford Bridge-a inkhelah hian Conte-a'n Mourinho a tih el ni awm takin che mah se Italian manager hian, "Tumah ka tih el lo," a ti.

12 February, 2017: Mourinho-a'n Chelsea chu tlarhnung phui ringawt ngaihtuah an nih avangin um phak an harsat tur thu tih el takin a sawi a, Conte-a'n Manchester United boss 'fiamthu' chuan a nuih a tih zat loh thu a sawi.

14 March, 2017: Stamford Bridge-a FA Cup inkhelah Chelsea-in United an hneh a, Blues fan-ten Mourinho au el mah se Portuguese manager hian, 'In tan number one ka la ni reng," tiin amah ṭan ṭhintu fan-te a chhang let.

29 July, 2017: Conte chuan, "Mourinho season ang kha pumpelh ka tum," tiin Premier League nomawi humhim a tum thu a sawi.

19 October, 2017: Conte chuan Mourinho chu amah in bihchiang a, a club hlui chungchang sawi tawh lo turin a ti.

4 January, 2018: Mourinho chuan, "Khelmual sirah mi ang lo ang maiin ka lam chiam ngai lo," tiin a sawi a, Conte a sawi chhanah ngaih a ni.

5 January, 2018: Conte chuan Mourinho kaplet nghalin, "A hun kal tawha a chet dan leh a thu sawi te a theihnghilh tawh a ni mahna, " a ti.

6 January, 2018: Mourinho chuan 'mi ang lo' tia a sawi chu Conte a ni lo tih a sawi a, mah se Italian manager hi kap zui zat thoin, "Ka nunah hian match fixing vanga hrem ka ni ve ngai lo ang," a ti.

7 January, 2018: Conte-a'n Mourinho a chhang a, "Thudik hre reng chung si leh court-in ka thiam lohna an hmu lo tih hre reng chunga ka mualphona min beih nan a hmang a nih chuan mi rilru hniam tak a ni, tih lantirna mai a ni," a ti.



Share this Post

Login to comment
No Comments