Santosh Trophy Judgement Day Mizoramin final round an la thleng lo - Assam coach

India hmarchhak aṭanga National Football Championship for Santosh Trophy vawi 72 khel tur team pakhat zawk chu vawiin hian a hriat dawn. Tlai dar 2:00 hian Lammualah Mizoram leh Assam ten North East Zone qualifying round an khel ang.

Mizoram tan Santosh Trophy final round thleng turin Assam lakah point khat chauh hlawhchhuah ṭul mah se an khingpui tur coach Subrata Bhattacharya chuan Mizoram leh Assam inkarah dinhmun ṭha zawk an la awm loh thu Vanglaini a hrilh.

Thlirletna

Qualifying round match hmasa berah Assam leh Arunachal Pradesh te an inkhel a, team pahnih danglamna chu own goal a ni. Minute 73-naah Arunachal Pradesh defender Nyali Ete chuan an lamah a tauh lut a, Assam-in chak an phu rualin an vannei tih phat rual a ni lo.

Assam-in goal khungna chance ngah mah se Arunachal lakah goal khat chauh an khung avangin dah san an harsa a, Mizoram tan final round thleng turin hna harsa tur a awm niin a lang lo.

Inelna thlengtu Mizoram inkhelh hun a thleng a, Assam aia an ropuina a tam lo. Mizoramin beisei tur nei tawh lo Arunachal chu goal hnih chauhin an hneh thei a, an mamawh tawk goal khung tho mah se an goal khung pakhat zawk hi penalty aṭanga an khung a nih avangin tling tur chianga dah an harsa tawh.

An insawifiah

Santosh Trophy-ah hian ṭum danga ball hman ṭhin Nivia - Shining Star hmang loin I League leh Premier League-a an ball hman ang Nike - Ordem hman a ni a, ball inang lo tak a ni. 

Assam coach Subrata Bhattacharya chuan, "Ball hi kan chhuanlam lo. Nike ball kan pet dawn tih kan hriat avangin kan lei mai thei a, training-naa kan hman ṭhin tho a ni. Amaherawhchu Assam-ah artificial turf-a khelhna tur kan nei lo a, lei mai theih a ni ve lo. Phaitual hnim nen a inan loh em avangin ka naute khan khelh an harsat a ni," tiin ball ni loin khelmual chu an duh anga an khelh theih loh chhan a nih thu a sawi a, Mizoram nen an inkhelh hunah a ziaawm a rin tawh thu a sawi lang bawk.

Mizoramin training-naah Nike ball an hmang a, inelna neihna hmun Lammual chu an practice-na chauh ni loin Mizoram Premier League khelhna hmun a nih avangin buaina tur a nei ve lo a, hei ngei hi 'home advantage' an tih ṭhin pawh a ni.

Amaherawhchu Arunachal  lakah goal hnih chauh an khung a, inkhelh zawhah Lalsangzuala Hmar a lawm lo. Mizoram coach chuan, "Inkhelh hmain tihdan tur kan duang a, thu zawm lo an awm. Ṭhiante pek theih reng laia pe lo te an awm a, ball chan loh laia thlenna tur thleng pha lo te an awm avangin team kan siksawi dawn. Assam nen starting eleven ngai kan hmang dawn lo," tiin player-ten hneh sa khelha Arunachal an hmachhawn chu a lawm loh thu a sawi ve thung.

Vanduai theihna

Assam coach Subrata-a'n an player-te'n artificial turf-ah tawnhriat an la neih loh thu sawi bawk mah se an rinrawl Milan Basumatary erawh Shillong Lajong player a nih avangin artificial turf-ah buaina a nei lo a, Lammualah pawh I Day Football khelin a rawn zin tawh.

Dutch club PSV Eindhoven-a trial nei tawh Milan hi kum 20 chauha upa a la ni a, theihna sang tak nei niin Arunachal keeper Tashi Topgey khelh ṭhat vang chauhin scoresheet-ah a hming a lang lo. AIFF Elite Academy aṭanga inzir chhuak Milan hi veteran player Akum Ao ten an ho avangin Mizoram tan Assam hi vanduai theihna an ni.

Akum Ao hi 2010 Santosh Trophy top scorer a ni a, kum lamah a upat deuh tawh avangin tlan chak tawh lo mah se awm hmun rawtah a la ṭhat avangin ven uluk a la ṭul ang. Assam hian Biaksangzuala an kawl bawk a, Arunachal nen pawh Mizo tlangval luh hnuah goal a lut a, inkhelh dan hmang a dang bawk.

Assam coach Subrata chuan, "Assam-in Arunachal lakah goal chance ṭhahnem tak kan hlah a, Mizoram tan pawh a chanchin a danglam chuang lo. Kan khelh fuh ni chu ni se goal tam zawk kan khung ve ve ang. Amaherawhchu goal kan khung tlem zawk avangin Mizoram hi kan hneh a ṭul a, football a nih avangin thil theih a ni. Mizoramin final round an la thleng lo a, Assam-in beiseina sang tak kan la nei a ni," tiin inelna thlengtu barakhaih a tum thu a sawi.

Chak tum Mizoram

Mizoram tlarhmaten goal a la khung lo a, Assam lakah pawh hian en bik an hlawh ang. Arunachal nena bul ṭantu Lalremruata'n Mizoram Premier League-ah goal riat a khung a, Tuikual North tlangval hi second half-a thlaktu MC Malsawmzuala nen bukin an awm dawn. Siaha tlangval MC-a hian MPL-ah season chawhnu lam chauh aṭanga a inlan chungin Chanmari FC tan goal nga a khung hman.

Mizoram coach Lalsangzuala Hmar chuan, "Kan khel ṭha tawk lo a nih chuan coach-in mawh kan phur a ni. Insiam ṭhat ngei tumin training-na hun darkar khat leh a chanve kan neih kan hmang ṭha a, Assam khelh dan kan zir uluk bawk. Santosh Trophy-a champion kan tum a nih chuan Assam hi kan hneh a ngai a, chumi mil chuan player pawh kan luhtir dawn," tiin Vanglaini a hrilh.

Assam hian ball an vawrh nasat avangin Mizoram hian tlarhnung lam pawh an thlak danglam tura ngaih a ni a, point khat chauh an mamawh tawh avangin chak duh mah se goal nawr dan chin tawk pawh an thiam ang.

Mipui an pawimawh

Mizoramin 2014 Santosh Trophy qualifying round match hnuhnung berah chak ngei ngei an mamawh a, mipui puihna nen Manipur an hneh.

Tun ṭumah pawh hian Mizo mipui tho an pawimawh dawn a, Assam tizam thei tur leh Mizoram tiphur thei tur khawp mipui an pungkhawm a nih chuan Mizoram hian final round an thleng ngei ang.



Share this Post

Login to comment
No Comments