Real-in quarterfinal lut

Real Madrid chuan second division club Numancia hnehin Copa del Rey quarterfinal an lut. Nilaini zan khan second leg khelh niin 2-2 in an inhnehtawk a, inkhel hmasa nen belhkhawmin Real hi 5-2 in an tlang.

Real hian an intawn hmasak ṭumin si thum faiin hnehna an chang thei a, second leg-ah hian Zinedine Zidane-a'n an inkhelh hmasak ṭuma player 10 ngawt a siksawi. Real tan hian Borja Mayoral chuan goal hnih khungin mikhual goal pahnih hi Luis Milla leh Alvaro Portilla te khung a ni thung.

Spanish club lian Real manager Zidane chuan, "Kan khingpuite kha an tlan tamin an taima em em a, kan tan hna a awlsam lo a ni. Kan khel ṭha a, round sang zawk kan luh avangin ka lawm. Tun ṭuma kan inhnehtawk hi sawi a tam deuh pawh a ni mai thei, mah se Numancia kha team beidawng duh lo an nih avangin thil mak a ni lo," tiin a sawi.

Real Madrid bakah hian Atletico Madrid, Valencia, Alaves leh Leganes ten quarterfinal an lut tawh a, Barcelona leh Celta Vigo te chu first leg-ah 1-1 a an inhnehtawk avangin Thawhlehni zan hian Nou Camp-ah an intawng leh dawn a ni.

La Liga champion lai Real Madrid hian tun season chu league lamah Barcelona an tluk rih lo a, season dang aiin nomawi dang chawi an duhna a sang zual ngei ang. 

Zidane chuan, "Ka team enkawl lai hi ka ringtawk a, hlawhtlinna chang turin kan ṭha tawk a ni. Dawhthei taka awm a ngaih chang a awm a, tunah hian inelna a la tawp loh avangin season tawpah enge lo theng tih hi a pawimawh chu a ni," a ti.



Share this Post

Login to comment
No Comments