PSG goal thun khawl Neymar

Neymar-a'n Paris St-Germain tan inelna hrang hrang palia a match hmasa berah goal a khung vek. Nilaini zan khan Neymar hian Amiens 2-0 a an hnehna inkhelah penalty chhuih lutin, a club thar hi French League Cup semifinal a hruai thleng.

Brazil captain hian PSG tan - Ligue 1, Champions League, French Cup leh French League Cup-ah te a match hmasa berah goal a khung vek a, Paris club tan hian match 22 a khelh aṭangin goal 20 a khung tling der tawh a ni.

Kum 25 mi Neymar hian League Cup bika a goal hmasa ber khung tur hian Thomas Monconduit-a penalty chawi chu a chhuih lut a, an goal hnuhnung zawk hi Adrien Rabiot-a'n a tauh luh a ni bawk.

PSG manager Unai Emery chuan training zawm tlai Edinson Cavani a la chhawr lo a, tlarhma laiah Kylian Mbappe chu dah a ni. France rawlthar Mbappe hian goal khung lo mah se goal hmaah a hlauhawmin an khingpui tlarhnung tana hnawksak ber pakhat a tling.

PSG hian tun hnai kum li chhung chu an rama domestic cup bik hi an thunun hneh hle, match 35 khelin League Cup hi vawi li an chawi bakah French Cup vawi thum an chawi bawk a ni.

Ligue 1 champion lai AS Monaco pawhin semifinal an lut tawh a, final lut tur chuan Montpellier an hneh leh a ngai dawn. PSG hian Rennes an hmachhawn ve leh thung ang.



Share this Post

Login to comment
No Comments