Kum 50 mi Miura inkhel zel dawn

Japanese striker Kazuyoshi Miura chuan thla tharah kum 51 tling tawh dawn mah se professional football khelh chhunzawm zel turin a la ṭha tawkah a inngai a, Japanese second division club Yokohama FC-ah contract thar a ziak leh ta. 

Kum 1986-a Brazilian club ṭha Santos aṭanga a career ṭantu striker hian season 33 chhung khel tawh record ama lo siam tawh vek chu a khum leh dawn tihna a ni. Genoa leh Dinamo Zagreb tan pawha lo khel tawh striker chuan, "Ka theihna zawng zawngin ka khel zel ang a, player ka nihna angin hma ka sawn zel pawh ka beisei," a ti!

Kum 2005 aṭanga Yokohama tana lo khel tawh striker hian a vanglai chuan ram tan match 89 khelin goal 55 a lo khung sak tawh a, J League bikah goal 139  khung tawhin he league-a goal khung hnem parukna a ni phak a, kum 2017 khan competitive match-a professional player goal khung thei upa ber ni turin Sir Stanley Matthews-a record kum 52 chhung lo awm tawh chu a khum bawk.



Share this Post

Login to comment
No Comments