Chencho hoa Bagan ngamtu Minerva

Minerva Punjab FC chuan I League table chung ber luah turin Nilaini zan khan an mikhualna ramah Mohun Bagan chu 2-1 in an hneh a, Punjab club-in season duhawm an hman chhunzawm zel - goal hnih hi Bhutanese forward Chencho Gyeltshen khung ve ve a ni. 

Mohun Bagan-in coach thar Sankar Lal Chakraborty enkawlna hnuaia an match hmasa berah 2-0 in Aizawl FC hneh nghal thei mah se an phur vanglai takin Punjab club-in an chhu dai a, match khata khel tam zawk chungin hmahruaitu hi point rukin an phak tawh lo. 

Zanin I League-ah inkhel pakhat a awm dawn a, tlai dar 5:30 hian Gokulam Kerala chuan Indian Arrows an mikhual ang. 

Beia a inlan

Coach kal chhuak ta Sanjoy Sen hnuaia hmun chang phak lo Beikhokhei Beingaichho-a'n Shankarlal enkawlna hnuaiah inkhel bul ṭanin tun season-a a inlan hmasak ber a ni a, Siaha tlangval bakah hian ṭum dang ang bawkin Ricky Lallawmawma chuan inkhel bul a ṭan bawk. 

Bagan tan first choice keeper Shilton Paul a inhliam avangin a hmun ruakah Shibinraj Kunniyil chuan goal a veng a, a hma tlaia training pawh zawm lo Aser Pierrick Dipanda-a'n inkhel bul a ṭan laiin Sony Norde erawh hliam vangin a la inlan thei lo. 

Hei le Chencho

Minerva Punjab-in Chencho-a thiamna leh theihna an hrechiang a, The Bhutanese Ronaldo tia hminglem an pek hi tlarhmaah a duhthala tal thei tura hmun pek niin Abhishek Ambekar, Moinuddin Khan leh William Asiedu ten hnung lam aṭangin an thlawp.

Minerva tan Kamalpreet Singh-a'n hun ṭha a khawhral hnu lawkah Chencho a inlar a, Bhutan international hian minute 23-na lekah yard 25 vela hla aṭangin goal hmahruai a khung. Chencho hian hun duhawm dang nei nghal mah se goal zawnah tak a pet a, insiamṭha turin minute hnih bak erawh a mamawh lo - Bagan defender mutthluk zar zoin a goal hnihna a khung chhunzawm. 

Bagan an vanduai

Kolkata club-in minute 30 chhunga goal hnih an chhuah avangin coach Sankar Lal-a'n insiamṭhat an ngai tih a hrethiam nghal a, Sheikh Faiaz a tlanluhtir. Minute 35-naah Bagan-in Faiaz thawhrah sengin penalty an hlawhchhuah chhunzawm a, tho leh tura an si phurh sut ṭhenna remchang tak ni mah se Ansumana Kromah chuan goal-ah a chantir thei tlat lo. 

Chawlhlawk hman a nih hnuah inkhel boruak a sang zual a, Moinuddin Khan chuan Minerva tan hun ṭha a khawhral chhunzawm. Bagan-in goal khung ngei tumin Naro Hari Shrestha tlan luhtir mah se DSK Shivajians forward hlui hian goal a keng tel bik lo a, hun pek belha yard 30 vel aṭanga Aizawl FC defender hlui Eze Kingsley goal khung chu mualpho zualpui khuhna chauh a ni tawh.



Share this Post

Login to comment
No Comments