Manchester Derby inkhelh zawhah a tawp lo Zaninah City, United leh Tottenham te inlan dawn

Pathianni zan Manchester Derby zawhah buaina a chhuak a, mi 30 buai zingah Manchester United manager Jose Mourinho leh City coaching staff zinga mi Mikel Arteta te an tel. He buaina chhuak hian zanina Premier League inkhel inkhel tur thlengin ngaihven a hlawh phah ang.

Pep Guardiola hote hian Wales-ah Swansea City an tlawh ang a, inkhelh hun hi zan dar 1:15 a ni. Minute 15 hnuah United-in Old Trafford-ah AFC Bournemouth an mikhual ang a, hemi rual chiah hian Wembley Stadium-ah Tottenham Hotspur-in kai thar Brighton & Hove Albion an hmachhawn dawn. Inrinni zanah City-in Etihad Stadium-ah Spurs an mikhual leh ang a, kartluanin inkhel a hmuhnawm a awm dawn tihna a ni.

Sawi zui hlawh buaina

City-in an hmelma United inkulhna Old Trafford an luhchhuah a, dressing room an panna kawngah an lawm tih thup an thup an tum lo. City player-te hian mualneitu dressing room bakah Jose Mourinho office an patlang a, Portuguese manager Mourinho insum loin, "Inzah tawhna in nei nange?," tiin a chhuahchhal a. United boss hi City goalkeeper Ederson nen inchhang zuiin English leh Portuguese ṭawng hmangin ṭawngkam an duhtui lo.

City lamin tui burin Mourinho an vawm a, hemi chungchang hi United coaching staff zinga pakhat chuan player zingah va zualko lehin Marcos Rojo leh captain Antonio Valencia te chu an pu chhan tura rawn tlan chhuak hmasa niin Ander Herrera, Marcus Rashford, Axel Tuanzebe leh Luke Shaw ten zuiin City dressing room lam an pan a, buaina lian zawk a in ṭan. Vicent Kompany telin mikhual lamin United player an hmachhawn a, Fernandinho chu kut tuar zingah a tel a, coach Mikel Arteta mit ko a kak bawk. 

Buainaah hian player dang leh coaching staff pawh telin mi 30 vel zet an tel a, khelmuala inlan lo United captain Michael Carrick erawhin buaina ṭhelh a tumin a player-te chu an dressing room pan tura nawr bakah City player-te chu, "Khingpuite zahna nei ta che u," tiin a zilh.

Arsenal striker hlui Ian Wright chuan, "City-in Premier League record siamin vawi 14 an chak a, an hmelma United lakah record hi an siam a, an lawm ve tur alawm. Mi tam takin an nungchang an sawisel a, kei erawh an tih dik loh lai ka hmu lo," tiin City player-te a chhan thung.

Insiam ṭhat ngal a ṭul

United midfielder Juan Mata chuan, "City nen kan duh ang result nei lo mah ila lungngaia indawm kun hman kan ni lo. Kan hmabakah inkhelh tur a tam a, kar khat chhungin match hnih khelh tur a awm nghal a, hei erawh Champions League kan khelh avangin kan tih ṭhan a ni. Bournemouth khel turin kan rilru zawng zawng kan sen a ṭul a ni," tiin a sawi.

Jose Mourinho-a'n Arsenal an hneh ṭuma hnawhchhuah Paul Pogba hrem vangin Cherries an hmachhawn hunah a la chhawr thei dawn lo a, Portuguese manager chhawr theih turin sawisel hlawh Romelu Lukaku leh match fitness nei lo Zlatan Ibrahimovic te an awm thung ang. United hian City aia chungnun an duh a nih chuan khelmual chhungah an lantir a ngai a, point hlawh a thiang tawh lo.

Dan theih loh City

Manchester City-in tun season Premier League-ah hneh loh an la tawng lo a, match 14 an chak zawn tawh bawk avangin Pep Guardiola hote hi dal thei an awm lo. Pep Guardiola hote hian kum 2002-a season khata chak zawn rei ber record Arsenal siam tawh chu an tluk chiah a, anmahni puala record nei turin Liberty Stadium-ah Swansea an hneh a ngai.

Spanish manager Pep chuan, "Swansea nena kan match hi inkhel pawimawh a ni a, poin thum hmu tura kan khelh a ngai," tiin chak ngei a tum thu a sawi. City defender Vicent Kompany chu derby-ah inhliam vangn lakchhuah a ni a, Pep-a hian centre back-ah Nicolas Otamendi leh Eliaquim Mangala te chhiah chhawr theih tur a nei a, amaherawhchu an tlarhma lam an dam ṭhat avangin point hloh phahna tur niin a lang lo.

Swansea manager Paul Clement chuan, "City hi table chunga bera awm an ni ringawt lo a, an khelh dan leh an point hmuh dan aṭanga team ṭha ber a ni. Khelh an harsa dawn tih kan hria a, tlawm sa a hmachhawn erawh kan tum lo. Hun harsa tak an hmachhawn theih nan kan theihna zawng zawng kan chhuah ang," tiin point hmuh ngei a tum thu a sawi.

Spurs hi...

Tottenham Hotspur-in season bul ṭan chhe lo mah se White Hart Lane sak ṭhat vanga Wembley Stadium an home match khelh nana an hman avangin Krismas hmain champion tur zingah dah an ni tawh lo a, point 28 hmuin paruknaah an awm mek.

Spurs tana thu lawmawm erawh Wembley Stadium-ah an tlangnel chho a, an match hnuhnung bera Stoke City 5-1 a an sawp bakah Champions League-ah Apoel Nicosia chu 3-0 in an hneh a, zanina Brighton & Hove Albion an hmachhawn hunah pawh inrintawkna an ngah khawp ang.

Tottenham boss Mauricio Pochettino chuan, "Kan inkhelh lehzel tur hi a pawimawh a, chuvangin kan chak pawhin lawmna hman pawh a awm lo. Player-te'n inrintawkna an neih theih nana kan khelh ṭhat chhawm nun zel hi a pawimawh a ni," tiin Brighton laka chet ṭhat a pawimawh thu a sawi.



Share this Post

Login to comment
No Comments