Bayern-a cham zel duh Rodriguez

Colombian star James Rodriguez chuan a loan hman zawh hunah pawh Bayern Munich tana hun rei zawk khelh chhunzawm zel a duh thu a sawi chhuak.

Rodriguez hian tun nipui transfer lai khan Real Madrid aṭangin Bayern Munich hi loan hmangin a zawm a, Bundesliga club tan hian season hnih khel turin inremna an ziak.

Kum 26 mi Rodriguez chuan, "Munich hi khawpui mawi leh nuam tak a ni a, he khawpuiah hian club lian leh ṭha tak tan ka khel mek bawk - hun rei zawk awm zel theih hi ka duh dan a ni," tiin a sawi.

FIFA World Cup 2014 top scorer hian manager thar Jupp Heynckes kaihhruaina hnuaiah season duhawm a hmang chho mek, inelna hrang hrangah goal hnih khungin a ṭhiante goal khung tur vawi 16 a siamsak tawh bawk.

Rodriguez chuan sawi zawmin, "Bayern tan eng nge ka tihsak ve theih ang tih hi nitin ka ngaihtuah ṭhin a, a pawimawh ber chu khelmual chhunga ṭha taka hun hman a ni," a ti.

German champion Bayern Munich hian Bundesliga season kal laiah RB Leipzig chunga awmin hma an hruai mek a, zanin dar 1:00 hian league match khel turin table mawngphaha awm Cologne an mikhual ang.



Share this Post

Login to comment
No Comments