Bayern-in phuba an la

German club lian Bayern Munich-in Carlo Ancelotti hoin Parc des Princes-ah Paris St Germain 3-0 ngawtin an hneh lo a, Italian manager Ancelotti-a'n a hna chan phah. Bavarian-in an manager hlui Jupp Heynckes an ko let a, Thawhlehni zan khan tun season Champions League group match hnuhnung berah German pachal hoin Allianz Arena-ah French club PSG hi 3-1 in an hneh let.

Group B-ah PSG leh Bayern ten point 15 ve ve an hmu a, head to head-a chungnung zawk French champion PSG chu hmahruaitu an ni. Inkhel dangah Celtic-in mikhual Anderlecht chu 3-1 in hneh lo mah se Scottish club hian Belgium-a 3-0 zeta hnehna an chan tawh avangin head to head hmang ṭangkaiin pathumna an ni a, Europa League knockout stage an khel ang.

Allianz Arena-ah Robert Lewandowski-a'n minute 8-na lekah Bayern hmahruaina goal a khung a, French midfielder Corentin Tolisso-a'n goal hnih (37', 69') dang a khung belh bawk. PSG tan Kylian Mbappe chuan 2-0 a nih laiin minute 50-naah an siphurh a sut ṭhen a, he goal hi inkhel tihmuhnawmtu a ni a, Bayern keeper Sven Ulreich-a'n khawvel player manto ber Neymar leh Mbappe te goal khung tur a dang.

French winger Franck Ribery chuan April 2013 hnua a vawi khat nan captain armband a hreng a, Bayern hian 2013-14 season-a Manchester City an hneh loh hnuah an mualah match 12 chhung chu group stage-ah hneh loh an tawng tawh lo.

Bayern manager Jupp Heynckes chuan, "Team thawhrah a ni a, kan duh dan ang takin kan khel chhuak a ni. Training-naah Kingsley Coman a thawkrim a, hma a sawn zel a, Corentin Tolisso pawh a danglam lo. Hun tawp lamah goal khung theihna tur an nei a, Sven Ulreich a khel ṭha hle a ni," tiin a sawi a. Keeper Sven Ulreich chuan, "Jupp Heynckes hian team a enkawl ṭantirh aṭangin ka chungah rinna a nghat a, min duhsakna hi chhanlet theih ka duh a ni," tiin a sawi ve bawk.

Bavarian goal khung khawl Lewandowski chuan kum 2017 chhungin ram leh club tana match 51 a khelh aṭangin goal 52 a khung tawh. Polish striker Lewandowski chuan, " Bundesliga, DFB Cup leh Champions League te hi kan champion leh thei a ni," tiin Heynckes hun hmasa lam anga treble champion an theih leh thu a sawi a, German club hi an group-ah pahnihna ni mah se second round-ah tum châkawm an ni lo ang.



Share this Post

Login to comment
No Comments