Atletico an tla; Chelsea chungah Roma

Kum li chhunga vawi hnih ngawt Champions League final lut thei Atletico Madrid chuan Chelsea khelmualah hnehna an chan zawh loh avangin Europe-a club inelna sang ber aṭangin petchhuah an ni a, 1-1 a an inhnehtawkpui Chelsea-in last 16 lut mah se inkhel dangah AS Roma-in 1-0 a Qarabag an hneh avangin hmahruaitu dinhmun erawh Italian club tan an ken a ngai.

Chelsea-in hmahruaitu nichunga last 16 an luh theih loh avangin tun dinhmunah chuan Paris St Germain emaw Barcelona tih lohah chuan Besiktas chiah an hmachhawn theih awm anga lang team an ni a, an kalkawng a awlsam dawn lo. Atletico-in season ṭantirah nomawi beisei mah se Europa League lamah an lungawi a ngai dawn ta thung. 

Mangṭha Atletico

Atletico Madrid, Chelsea leh Roma te group khatah an awm tih hriat a nih khan Roma chu team vanduai tia sawi an ni a, Atletico leh Blues chu last 16 lut chiang tura ngaih an ni. Group stage khelh zawh a nih meuh erawh chuan Roma chu group hmahruaitu an ni a, Atletico kan mangṭha thung.

Stamford Bridge-a inkhelah Atletico tan hian Saul Niguez chuan minute 56-naah Fernando Torres ball siamsak chu a tauh lut a, Stefan Savic chuan Eden Hazard ball cross chu an lamah a tih luh avangin 1-1 in an inhnehtawk. Spanish club tan Antoine Griezmann-a'n beisei a phak lo a, Chelsea tana match 172-a khelha goal 46 khungtu Torres chu player hmuhnawm zawk a ni - Blues striker hlui hi lakchhuah a nihin Stamford Bridge-a fan-ten an zahna entir nan ding chungin an thlah liam.

Hlauh nei lo Chelsea

Chelsea-in pakhatna dinhmun an luah theih miau loh avangin last 16-ah team hlauhawm zawk an tum chance a sang a, an thiampuipa Eden Hazard erawh chuan eng team pawh an hmaah ding se an hlauh loh thu a sawi - Belgian forward chuan, "Kan hmaah tupawh ding se kan hlau lo, Chelsea kan nih hi. PSG leh Barcelona hi team ṭha tak an ni tih kan hria a, chutiang chiah chuan keini pawh team ṭha kan ni. Eng pawh kan thlentir thei," tiin an team a ringtawk hle.

Blues manager Antonio Conte pawhin, "Min hmachhawn tur team chu an hlim bik lo tawp ang," tiin team hmachhawn hautak an nih thu a sawi a, tupawh an ngam thu a sawi tel bawk. Conte chuan, "Champions League khelh a, last 16 kan lut a nih chuan eng team pawh hmachhawn turin kan inpeih a ngai tihna a ni. PSG, Barcelona leh Besiktas te hmachhawn tur hian kan ṭha tawk tih kan hria," tiin a naute a ringtawk.



Share this Post

Login to comment
No Comments