IOC-in Russia a hrem chhunzawm

International Olympic Committee (IOC) chuan Thawhlehni khan Russia chungchanga an thutlukna an puang a, 2018 Winter Games-ah Russia an inlan ve thei dawn lo. Russian athlete zinga dan leh hrai zawm famkimte erawh chu an ram hming ni loin Olympic flag hnuaiah neutral athelte angin an inlan thei dawn thung a ni.

IOC president Thomas Bach kaihhruaina hnuaia Russia chungchang ngaihtuahtu board chuan thuchhuah siamin, "Olympic Games hlutna leh thianghlimna vawn nun zel a nih theih nan Russia hi an la inlan ve rih lo ang," tiin thu an ti tlu. 

Bach chuan, "Dan bawhchhiatna hian infiamna huang hmel a ti balin thawhhona a ti chhe thei a, tun bak hi chu thleng nawn tawh lo se kan duh takzet," a ti. Russia hi Olympic-ah chuan sulhnu nei ṭha leh ram dangte pawhin an el tawk tak an ni ṭhin a, an tel lo tur hi ram ṭhenkhat tan chuan chanchin lawmawm a ni thei ang.

Winter Games hi nakkum February 9-25 chhungin Pyeongchang, South Korea-ah neih tur a ni dawn a, khawvel ram 90 vel aṭangin infiammi 1000 chuang an pungkhawm tura ngaih a ni a, infiamna discipline hrang hrang 15 hnuaiah gold medal 102 dawn theih a awm ang.

Russia hian 2014 Winter Games kha an khawpui pakhat Sochi-ah an thleng a, khami ṭum khan an ram sorkar hriatpuina hnuaiah infiammi tam takin dan an bawlhchhia tih hmuh a ni, he infiamna khawmpui lian bakah hian tun hnai kum thum chhung velin infiammi tam takte thisen leh zun endikna chu an ti chhia tih hmuh chhuah a ni.

World Anti Doping Agency (WADA) hnauiah Canadian law professor leh sports lawyer ni bawk Dr Richard McLaren-a'n Russia chungchang hi a zirchiang a, a hmuhchhuah dan chuan kum 2012-2015 inkar vel khan Russian infiammi 1,000 chuang ten infiamna chi hrang 30 zetah dan an bawhchhiah niin a tarlang.

IOC hian Sochi Games neih laia Russia deputy prime minister Vitaly Mutko chu damchhung atan infiamna huanga inhnamhnawih thei tawh lo turin an lo hrem hial tawh a, Mutko hi 2018 FIFA World Cup an thlen theihna tura hma latu organising committee head a nih avangin nakkuma football khawmpui lian an thlen tur pawh hian sawi a hlawh chho hle tura ngaih a ni.

Russia sorkarin an rama infiammite chunga a thiltih hi hriatchhuah a nih hnuah IOC chuan nikum Rio Olympic-ah khan Russia chu an inlan a phal lo tawh a, inelna neih dawnah an ram tan dan leh hrai zam ṭhat niin a endik hnua tling leh tlak nia an ngaihte chu neutral athlete angin an inlan an phal sak.

International Association of Athletics Federation lam chuan Russia chungah hian hremna pumhlum neih a duh hial a, chutih rualin IOC lam chuan hun kal zel tur ngun taka an ngaihtuah hnuah hrem pumhlum tawp chu ṭha an ti lo thung. Rio Olympic-a an tih tawh ang bawkin nakkum Winter Games-ah hian an kalpui leh dawn ta zawk a ni.



Share this Post

Login to comment
No Comments