Arsenal tan indahṭhat hun

Arsene Wenger-a nau ten Europa League knock out round an lut chiang tawh a, point 10 neiin Group H hmahruaitu an ni chiang tawh bawk, an hmabak awm chhun chu point hmuh belh aiin player tawnhriat nei tlem zawkte inkhelhna hun siamsak a ni - zanin dar 1:35-ah BATE Borisov an lo mikhual ang.

Arsenal hi an match hnuhnung berah Cologne khelmualah si khat faiin an tlawm a, Bundesliga club Cologne leh Red Star Belgrade ten group stage paltlang beiseina an la nei, zaninah anni pahnih hi Rajko Mitic Stadium, Serbia-ah an intawng ang; a chak zawkin Arsenal hnung an zui thei dawn, an inhnehtawk a nih chuan Serbian club Red Star Belgrade an tlang dawn a ni.

Amaherawhchu, Cologne leh Red Star Belgrade te an inhnehtawk hlauh a, Emirates Stadium-ah BATE Borisov an chak a nih chuan Belarus club hian an chunga awm pahnih lehpelin knock out round an la lut daih thei, club pathum bukin an awm dawn.

Inkhek hun

Gunners hi Manchester United laka tlawm hlim an ni a, kartawpah Southampton an lenchilh leh dawn. North London club hi an khelmual Emirates Stadium-ah match 20 chhung hneh loh nei loa an kaltluan hnuah an tlawm a ni a, tun season league match bika an chak loh hmasak ber ṭum a ni bawk - record siam turin zanin hi an tan bulṭan thar lehna hun ṭha a ni.

Arsene Wenger-a'n Premier League a ngaihpawimawh avangin Europa League lamah player ṭha a chhawr ngai lo a, zaninah pawh Mesut Ozil, Laurent Koscielny, Alexis Sanchez leh Alexandre Lacazette te hmel kan hmu lo ang.

Gunners senior player zingah Per Mertesacker, Francis Coquelin, Jack Wilshere, Olivier Giroud, Danny Welbeck leh Theo Walcott te chu inlan turin an inpeih a, Emirates Stadium-a inkhel tur an nih avangin rawlthar rual pawh kan hmuh leh a beiseiawm. Chuba Akpom, Reiss Nelson, Eddie Nketiah, Ben Sheaf leh Joe Willock te chuan first team training an zawm a ni.

Gattuso hoin

AC Milan manager thar Gennaro Gattuso-a'n zanin hian a vawi khat nan a club chu European football a khelhpui dawn, player a nih laia Champions League nomawi vawi hnih chawi tawh a nih avangin player fuih dan tur chu a hre tawk tura ngaih a ni. Milan hi Croatian club Rijeka nen dar 11:30-ah an intawng ang.

Italian manager kaihhruaina hnuaia an match hmasa berah Milan hi Serie A kaithar Benevento nen 2-2 in an inhnehtawk a, hun pek belha  goalkeeper Alberto Brignoli tauh luh vangin point hnih an hloh. Gattuso hian hun tawp dawn an goal chhuah dan chu, "Chemtea vih ai pawhin a na zawk," tiin a sawi a, rilru na thawidam nan zaninah chak a duh hle ang.



Share this Post

Login to comment
No Comments