United leh Basel an tlang

Manchester United-in Champions League group A hmahruaitu ni turin CSKA Moscow chu an mualah 2-1 in an hneh a, Romelu Lukaku-a'n goal a khung. Thawhlehni zan inkhel danga Benfica hnehtu Basel-in last 16 an lut ve bawk.

A thiam zingah

Jose Mourinho-a'n Manchester United a enkawl ṭan season-ah Europa League an khel a, Pemier League hmangin Champions League khel phak lo mah se Europa League-ah champion nomawi chawiin Europe-a club inelna sang ber an khel phak hram.

Tun ṭum hi Portuguese manager Mourinho hnuaiah United an inthuam ṭha a, Sir Alex Ferguson-a'n manager hna a chawlhsan hnua United-in knockout stage ṭum hnih an thlen lehna chauh a ni a, Europe team ṭha zingah an tel leh tawh.

Old Trafford-a inkhelah hian first half tawp hma hreta Vitinho hmanga CSKA Moscow hmahruaitu chu Manchester United-in Lukaku (64') leh Marcus Rashford (66') te hmangin an lehthal a minute 90 chhunga inkhel thununtu an chak. United tana thu lawmawm chu left wing back Luke Shaw-a'n minute 90 chhung a inlan a, goal nawr kawngah pawh a ṭangkai hle.

Estadio da Luz-ah Basel-in mual neitu Benfica chu Mohamed Elyounoussi (5') leh Dimitri Oberlin (65') chu 2-0 in an hneh a, Portuguese club hian chak an nei lo. Swiss club-in United hnung zuiin knockout stage an lut a, CSKA Moscow-in Europa League an khel thung ang.

Football dan?

CSKA goal luh theih nan Vitinho ball pet chu keeper Sergio Romero leh United player awm hnuhnung ber Chris Smalling inkara awm Alan Dzagoev hnung perin a lut. Khelmual pawnah CSKA player Fernandes leh a cross dan tumtu Daley Blind te chu an tleng chhuak bawk. 

Chhut chiang lo tan chuan CSKA goal hi offside a ni a, amaherawhchu International Football Association Board dan aṭanga chhut chuan referee thutlukna a dik. Referee hriatpuina tel loa khelmual pawn chhuak chu goalline emaw touchline a awm anga ngaih tur an nih avangin Dutch defender Blind hi Dzagoev hnungah a awm a, offside a ni lo.

Lukaka leh goal

Manchester United striker Lukaku hian United a zawm hnuah match hmasa 10-ah goal 11 a khung a, amaherawhchu match hnuhnung 13-ah erawh CSKA lama a goal khung hi a goal hnihna chauh a ni. 

Portuguese manager Mourinho chuan fiamthuin an striker hian goal khung leh turin boot siamtu company lam aṭanga contract a mamawh thu a lo sawi tawh a, CSKA lama Belgian striker-in goal a khungna boot pawh a hi dum hlang tawp a ni. Lukaku hi nike, adidas leh puma ten an dawr a, adidas lamah a awn ber nia sawi a awm a, contract hlut zawng tur hi kum khatah pound maktaduai 1.5 ang vela sawi a ni bawk.

Mourinho chuan, "Lukaku hian goal khung lo mah se assist a neih loh pawhin goal khung theihna turah a inrawlh zel a, Champions League-a goal a khung hi ka lawm pui a, kei chu a khelh danah ka lawm sa reng," tiin thiam takin a striker chungchang a sawi.

Hmabak

United hi group hmahruaitu an ni nachungin an hmabak erawh a awlsam dawn lo. Europe club lian Bayern Munich, Juventus leh Real Madrid te chu an group-ah pahnihna an ni a, hei hi Mourinho hote hmachhawn theih tur an ni. Heng club lian pathum bakah hian nizan lama inkhel Sevllia emaw Spartak Moscow, Shaktar emaw Napoli leh Porto emaw RB Leipzig te an hmachhawn thei bawk.

Jose Mourinho chuan, "Draw-naah hian ka vannei ṭhin lo a, February-a inkhel tur chauh a nih pawhin tupawh tum ila buaina tur vak awmin ka hre lo. Keini chuan inelna dang kan ngaihtuah a ngai a ni. Chak lo chunga knockout stage luh te hi a ṭha lo a, ṭha taka tlin kan duh ang ngeiin kan tling thei a, a lawmawm hle a ni," tiin a sawi a, United hian Pathianni zan hian Manchester City nen league-ah an inhmachhawn ang.

Champions League tie draw hi December 11, Thawṭanni tlai dar 4:30-ah Lyon-ah pawh a ni ang.



Share this Post

Login to comment
No Comments