ISL-ah Keane a inlan tawh dawn?

India rama football inelna ngaihhlut Indian Super League-ah Robbie Keane a inlan tawh mai thei - zanin dar 8:00 hian Atletico de Kolkata chuan khualmualah Chennaiyin FC an lenchilh dawn a, hliam vanga ATK tana match hmasa pathum khel thei lo Robbie Keane a inlan thei tawh mai thei. 

ATK official, a hming tarlan loh chuan Tottenham Hotspur striker hlui hi Chennai-a zin zingah a tel tur thu sawiin, "Match thum kan khelh tawhah vawi khat tlawmin vawi hnih kan inhnehtawk a, coach Teddy Sherringham tan chuan Keane-a lo kir leh ta hi a lawmawm ngawt ang. Irish striker hi Chennai-a zin zingah a tel dawn a, inkhel bul pawh a ṭan ngei a beiseiawm a ni," tiin Liverpool striker dinhmun a sawi.

Hetihlai hian Kolkata club hian chanchin lawmawm loh dang an nei a, an midfielder pawimawh Eugeneson Lyngdoh chu tun season chhung hliam vanga a inlan a beiseiawm tawh lo. Khasi midfielder hi Jamshedpur FC nen an inkhelh ṭumin hliam vanga lakchhuah a ni a, ATK coach Sherringham chuan JFC khelmual JRD Sports Complex chhiat lutuk vangin a player chu a inhliam niin a sawi a, a lungawi lo hle. 

Tun dinhmunah ATK damdawi-in a lun rih hle. Defensive midfielder Shankar Sampingiraj, defender Anwar Ali, Portsmouth attacking midfielder hlui Carl Baker leh I League-a Aizawl FC champion-na kawnga player thawhhlawk Jayesh Rane te chu hliam vangin an chhawr thei lo mek a, Aizawl FC player hlui tho Ashutosh Mehta erawh a hliam dam ṭan tawhin JFC lakah khan bench-ah dah niin Chennai-ah a zin ve a rinawm.



Share this Post

Login to comment
No Comments