Barca hnungzuiin Juve an tlang

Champions League Group D aṭangin Barcelona an inpet tlin hnuah Juventus chuan last 16 an lut ve leh ta. Catalan leh Turin club lian pahnih hian Thawhlehni zan khan an khingpui te chu si hnih fai ve ve in an hneh a, an group-a pathumna Sporting Lisbon chuan Europa League an khelh chhunzawm thung ang.

Goal hnih

Ernesto Valverde enkawl Barcelona hian Champions League an match hnuhnung pahnihah Juventus leh Olympiakos te goal awm loin an inhnehtawkpui a, Turin club an hmachhawn ṭum ang bawkin Sporting Lisbon lakah Lionel Messi chu bench lamah ṭhuttir leh a ni a, goal an neih hnuah Aleix Vidal thlakin Messi hi dah luh chauh a ni.

Catalan club tan Luis Suarez-a'n Liverpool tana a khelh pui tawh Sebastian Coates tihsual vanga a hun ṭha neih chu a chhawr ṭangkai thei lo hlauh, Uruguay international striker goal khung tur hi goalkeeper Rui Patricio-a'n ṭha takin a dan sak.

Chawlhlawk hmain goal a lut lo, minute 59-naah Paco Alcacer chuan goal hmahruai tauh lutin hun pek belhah Barcelona defender hlui Jeremy Mathieu-a'n anmahni lamah a ti lut palh a, Sporting Lisbon beiseina a tawp zui nghal bawk.

Portuguese club Sporting hian an match hnuhnung ber an khelh hma hian beisei an la nei, Nou Camp-ah hnehna chang se; inkhel lehlamah Juventus chak lo ni se last 16 lut thei an la ni. Amaherawhchu, Barca lakah an tlawm a, khualmualah Juve an chak bawk avangin Europa League bak an beisei thei ta lo.

Barca boss Ernesto Valverde chuan, "A chang chuan ropui leh hmuhnawm takin kan khel a, a chang chuan kan chak hram hram ṭhin thung. Tun ṭumah chuan a pawimawh ber point thum kan hmu a, goal kan chhuah lo bawk," a ti. Barcelona hi group hmahruaitu an nih avangin last 16 khel tur draw neih a nih hunah chuan seeded an ni ang.

Buffon tel loin

A chawn na vangin Gianluigi Buffon-a'n Olympiakos a hmachhawn thei lo a, Arsenal goalkeeper hlui Wojciech Szczesny chuan Thawhlehni zan khan Juventus tan a vawi khat nan Champions League-ah goal a veng a, minute 90 chung a chhuah lo. Juan Cuadrado leh Federico Bernardeschi te goal hmangin khualmualah 2-0 in hnehna an chang.

Turin club hian Buffon bakah defender rinrawl Giorgio Chiellini chu hliam vangin Greece-ah an hruai thei lo a, point mamawh an la nih avangin an dinhmun a ṭha tawk lo. Midfielder Miralem Pjanic erawh bench aṭangin a lut thei tawh thung.

Massimiliano Allegri-a'n kartawpa Napoli laka chakna goal khungtu Gonzalo Higuain lakah rinna nghat zuiin tlarhmah mal tlattir a ni a, Mario Mandzukic erawh substitute bench lamah dah a ni thung. Argentina international striker Higuain hian Greek club tlarhnung a su nghing fo a, mahse nidang angin goal a pai tel lo.

Higuain-a'n goal a khung loh niah ram leh club tana a khelh pui Paulo Dybala pawhin a khung thei bik lo, kum 24 mi Dybala hian tun season Champions League bikah goal a la khung lo a; season tir lam khan Serie A match hmasa parukah goal 10 khung thei mah se hemi hnuah goal hnih dang bak a la khung belh leh lo a ni.

Juventus manager Allegri chuan, "Paulo Dybala tan hun harsa a ni mek a, chutihrualin nakin lawkah goal chu a rawn khung leh ang tih ka chiang. Training kan nei ṭha em em a, player dang ang bawkin a thawkrim a ni," tiin a player duhlai khelh danah a buai loh thu a sawi.



Share this Post

Login to comment
No Comments