Croatia-in World Cup khel dawn

Croatia-in 1998 FIFA World Cup-ah khawvel barakhaihin pathumna an ni a, hemi hnu hian group stage an la kal pel lo. Tunah chuan Croatia hi football thiam ram zingah chhiar tel an ni tawh a, Zlatko Dalic hote hian playoff-ah Greece chu aggregate-ah 4-1 in an hneh a, nakkuma inelna neih hunah team hmuhnawm zingah an tel pha ang.

Vatreni (Croatia sawina) hian first leg-ah 4-1 a hnehna an chan tawh avangin second leg khel tura Greece an tlawh ṭumah pawh hian pressure lian tham an nei tawh lo. Pathianni zan inkhelah hian goal a lut lo a, Croatia hi chak phu zawk an ni.

Thlirna Tawi

Inter Milan winger Ivan Perisic chuan goal ban a pet per a, hemi hma hian Greece player Zeca-a'n Ivan Strinic laka a foul avangin penalty chawi tur an ni a, amaherawhchu freekick pek an ni thung. Mualneitu Greece-in hun tawp hnaiah Dimitrios Pelkas hmangin goal khung mah se offside vangin pawm a ni lo.

Euro 2004 champion Greece an vanduai a, playoff-a team tum châkawm lo ber ang hiala sawi theih Croatia an pawt fuh a, Brazil-a World Cup khelh ṭumin knockout stage thleng pha mah se Russia erawh an pan thei dawn ta lo.

Croatia chu...

Croatia hming lam rik rualin Davor Suker hming a ri ring nghal a, Real Madrid leh Arsenal striker hlui hian 1998 World Cup-ah goal ruk khungin top scorer a ni a, hming a chher bakah khawvel huapin an ram a lar phah bawk.

Croatia hian semifinal thleng turin champion rinkai zinga mi Germany chu quarterfinal-ah 3-0 ngawtin an sawp a, France hneh loin final thleng zo lo mah se pathumna inchuhnaah Netherlands an hneh a, Suker chuan knockout stage match tinah goal a khung vek.

Yugoslavia aṭanga indang Croatia hian football inelna lian tham an hmachhawn hmasak ber chu Euro 1996 niin quarterfinal an thleng nghal a, Euro 2000-ah tling pha lo tih loh chu European championship hnuhnung paliah an inlan vek.

FIFA World Cup-ah pawh Croatia hian kum 2010-a an inlan loh tih loh chu an tel ṭan theih kum aṭangin an inlan vek a, amaherawhchu 1998-a semifinal an thlen hnuah group stage an la paltlang leh lo.

Coach thar nen

Croatia hian an coach Ante Cacic hnuaia World Cup khel lo thei dinhmuna an din hnuah kum 51 mi Zlatko Dalic team enkawl tur atan an ruat a, group match hnuhnung berah Ukraine hnehin playoff khel turin an tling.

Dalic hnuaiah Croatia hian match thum khel tawhin vawi hnih an chak a, vawi khat an inhnehtawk. Greece nena an inkhelh ṭum hian buaina chhuah a hlauhawm avangin ram pahnih hruaituten 'away fan' neih an khap ve ve a, an inhnehtawk ṭum hian Croatia hian fan an nei lo tihna a ni.

Kum 51 mi Dalic hian an ram club leh Saudi Professional League club a enkawl tih loh chu sulhnu lian tham a la nei lo a, tunah hian contract nghet ziah pui a la ni lo. Amaherawhchu, a enkawl chinah an record a ṭhat avangin captain Luka Modric chuan coach atana a duh thu a sawi tawh.

Real Madrid midfielder Modric chuan, "Dalic hi coach atan an dah nghet lo a nih chuan a mak khawp ang. Hna ṭha takin a thawk a, Russia kan pan theih dawn avangin a chungah hian lawm thu ka sawi duh a ni," tiin Dalic-a hnuaia khelh zel a duh thu a sawi.



Share this Post

Login to comment
No Comments