Joshua ringtu Barry Hearn

Anthony Joshua inhnek promote ṭhintu Matchroom boss Barry Hearn chuan a boxer Joshua chuan boxing hmanga billionaire nih a tum chu a hlawhtlinpui theih a rin thu a sawi. 

IBF leh WBA heavyweight champion Joshua hian vawi 20 inhnek a hmachhawn tawhah a khingpuite a la knockout vek a, a fight hnuhnung berah Carlos Takam chu Cardiff khawpuiah a hneh.

Matchroom boss Hearn chuan, "Anthony hian a thil tum hi a ti thei em em ang. Mahse, chumi tur chuan kum 10 tal hneh loh tawng loa a kal tluan a ṭul dawn a, tunah kum hnih chhung ngamtu tawng loin a kaltluang tawh a, a tan hna harsa niin a lang lo," tiin a boxer chu a dah sang hle.

Heavyweight boxing boruak a thi mek tawh nia sawi a nih laia rawn chawi nung leh mektu Anthony Joshua hi tunlai boxer-ah chuan a langsar ber pawla chhal ngam a ni a, Deontay Wilder, Tyson Fury leh Joseph Parker ten hmachhawn an duh thu an sawi vek tawh - sum tam tak hmuh belh theihna vek an ni.

Boxing hmanga mi hausa tawntaw nih a tum thu sawitu boxer hi a hausak zawng an chhut saknaah chuan pound maktaduai 50 vel a nei der tawh nia sawi a ni a, a sum hmuhna hi a inhnek aṭanga a hlawhchhuah piah lamah sponsorship pawh a tel.



Share this Post

Login to comment
No Comments