Fed Cup champion US

Ram leh ram hmeichhe tennis team hmanga inelna Fed Cup final chu Pathianni zan khan khelh zawh a ni a, United States chuan Belarus lakah 3-2 a hnehin a vawi 18 nan an champion a, tun hnai kum 17 chhunga nomawi an chawi lehna hmasa ber a ni thung.

Fed Cup hi best of five hmanga chak zawk zawn ṭhin a ni a, ram pahnih ten game hnih ve ve hnehna an chan hnuah double khelh niin US tan hian Coco Vandeweghe leh Shelby Rogers te ṭhiandun chuan Aryna Sabalenka leh Aliaksandra Sasnovich te lakah 6-3, 7-6 (7-3) a hnehna changin an ram an hlawhtlinpui.

Belarus hian a vawi khat nan Fed Cup final an khel a, nomawi chawi tur pawhin beiseina an nei sang hman hle. Amaherawhchu, Grand Slam vawi hnih champion tawh Victoria Azarenka chu chhungkaw rokhawlhna vangin an chhawr thei lo, inelna boruak sang chinah an thiampuinu tel loin an ṭha tawk lo deuh a ni.

US hian Serena leh Venus Williams te unau an chhawr thei lo a, heti chung hian champion turin player an nei ṭha tawk. Tun season-ah US nula te an vul thar leh hle; Grand Slam hnuhnung ber US Open-ah pawh khan singles bikah semifinal lut thei player pali chu khawtual star vek an ni hial.

Kum 2000 khan Lisa Raymond, Lindsay Davenport, Monica Seles leh Jennifer Capriati te awmna US team chuan Fed Cup hi an lo chawi tawh a, tunah chuan an rawlthar beiseiawm ten an sulhnu an rawn chhui ve leh chiah a ni.

US captain Kathy Rinaldi chuan, "Player paliin kan theihtawp kan chhuah a, court pawn lam aṭangin thlawpna kan dawng ṭha em em bawk, final bikah hian ni dang zawng aiin kan khel ṭha tlangin ka hria. Season hahthlak tak hmang zo ni mah ila ram tan khan kan theihna zawng zawng kan hlan a ni," tiin a sawi.



Share this Post

Login to comment
No Comments