Hnehna nen Federer-a'n bul a ṭan

ATP Finals khelh mekah Pathianni zan khan Roger Federer chuan a match hmasa ber khelin Jack Sock lakah hnehna a chang a, Alexander Zverev pawhin Marin Cilic a hneh bawk.

O2 Arena, London-a inkhelah kum 36 mi Federer hian a vawi khat nana ATP Finals kheltu American tlangval Sock hi 6-4, 7-6 (7-4) in a hneh. Swiss thiampuipa Federer hian ATP Finals vawi 15 a khelhna a ni thung a, season kharna tournament-ah hian vawi ruk a champion tawh.

Grand Slam vawi 19 champion tawh Federer chuan, "Season hmasa khan hliam vangin ka khel thei lo a, kuminah ṭha taka bul ka ṭan theih avangin ka lawm hle. Set khatna a awlsam a, set hnuhnung zawk erawh vanneih vanga la ka ni," a ti. Federer-a'n ATP Finals nomawi a dawn hnuhnun ber chu kum 2011 daih tawh kha a ni.

Boris Becker Group match dangah German rawlthar duhawm Zverev chuan US Open champion hlui Marin Cilic chu 4-6, 6-3, 6-4 in a hneh ve bawk. World number 3 Zverev hi kum 21 mi chiah a la ni a, kum 2008 (Juan Martin del Potro) hnu lamah a thiam pariat te tana buatsaih inelna a inlan thei naupang ber a ni.



Share this Post

Login to comment
No Comments