Steven Knight hoin Aizawl-ah Futsal Zirna

Asian Football Confederation Futsal Instructor Steven Knight-a kaihhruaina hnuaiah nimin aṭang khan Ramhlun Sports Complex-ah Asian Football Confederation Level 1 Futsal Course kalpui ṭan a ni.

Futsal zirna hi Mizo zinga AFC 'C' Licence nei, football coach mi 10 chuang leh state dang aṭanga lokal mi pakhatin course hi an zawm a, ni 6 chhungin Futsal kaihhnawih chitin, a bulṭhut atangin an zir dawn a ni. 

Instructor Steven Knight chuan, "A thua hriat ngawtin coach ṭha a nih theih loh a, a tam thei ang ber practical-in kan ti ang," tiin futsal thiam turin thu (theory) ringawt chu a tawk loh thu a sawi.

Hawnna inkhawmah MFA hony. secretary leh, Futsal committee chairman ni bawk Lalnghinglova Hmar chuan ani anga tawnhriat ngah, AFC Elite instructor 15 zinga pakhatin min rawn kal chilh thei chu lawmawm a tih thu a sawi a. India rama Futsal lar chhoh dan leh Mizorama league mumal kalpui a nih dan tur te, hma kan sawnna tura course chhimtu coach te pawimawhzia a sawi lang bawk.

Australian Futsalroos coach lo ni tawh Steven Knight hi football player hlui, a hnua futsal player ni a, a chawlh hnua futsal coach leh futsal coach instructor ni zui ta a ni. Futsal chu football a hmasawnna thlentu tur a nih thu te, Lionel Messi pawh futsal khel ṭhin a nih thu te sawiin, Australia coach a nih chhoh dan te, Oceania aṭanga Asian Football Confederations hnuaia Australia an luh tak hnua Futsal World Cup an khelh chhoh dante a sawi a. An ram futsal team a kaihhruai hunlai chanchin ngaihnawm te a sawi a ni. Steven chuan Asian team Japan, Thailand, Iran, Kuwait leh Uzbekistan angte Futsal khawvela an ṭhat zia a sawi a, anni ho zinga Futsalroos han intah luh ve a hautak dan te, mah se Australia chu world ranking-ah 20-na a nihpui chhoh ve thu te a sawi.

Mizoram Football Association chuan Futsal Committee dinin, an kaihhruaina hnuaiah chak taka hma lak chhoh mek a ni a. January thlaah team 16 awmna tur Futsal League khelh tura inbuatsaih mek a ni. Tun dinhmunah MFA-ah Futsal team in register tawh 40 an awm a, League playoff leh tournament vawi khat buatsaih tawh niin, Division One a awmte tan tournament buatsaih tumin committee chu a inpuahchah mek bawk a ni.

India ramah kum 2011 khan Trivandrum-ah a vawi khat nan AFC Futsal Level I course hi buatsaih a lo ni tawh a, Mizoram-ah buatsaih a ni leh ta a ni. 



Share this Post

Login to comment
No Comments