Rep of Ireland nge Denmark?

Zanin dar 1:15 hian Republic of Ireland-in Aviva Stadium, Dublin-ah Denmark an mikhual dawn a, he inkhel zawh hian Europe aṭanga FIFA World Cup 2017 khel tur a hriat kim theih ang.

First leg-ah ram pahnih hi goal awm loin an inhnehtawk a, Denmark goalkeeper Kasper Schmeichel chuan inkhelhna hmun Parken Stadium ṭha tawk lo chu pawi a ti hle. Leicester City goalkeeper Schmeichel chuan, "Phul a awm lo a ni ber a, lei a nem a, League Two club Bury tana ka khelh lai minti hre chhuak. Inkhel pawimawh taka khatiang taka khelmual chhia kan khel kha pawi ka ti hle," tiin an ram khelmual chu a sawisel.

Schmeichel chuan sawi chhunzawmin, "Game rang tak khelh kan tum a, amaherawhchu duh aia tam ball khawih a ngaih avangin kan duh angin kan khel. Team pahnih tan khelh a harsa ve ve a, chhuanlam atan erawh kan hmang lo. Second leg khelhna tur hi a ṭha zawk turah ka ngai a, kan tum dana kan khelh theih tawh ka beisei a ni," tiin a sawi.

Copenhagen-a first leg khelhah hian Denmark ball semtu Christian Eriksen chu dah ṭhatin a awm a, second leg-ah pawh Tottenham Hotspur midfielder hi ven uluk leh a ṭul dawn. Eriksen chuan, "Dublin-a goal kan khung ve ve chuan a tlang zawk tur kan ni a, hei vang hian kan dinhmun a ṭha zawkah ka ngai. Player zawng zawngin an ram World Cup thlen pui an duh a, hei aia ropui chuang hi a awm lo," tiin FIFA World Cup a ngaih hlut thu a sawi.

Republic of Ireland-in first leg-ah goal venhim hna an thawk a, coach Martin O'Neill chuan second leg-ah chuan an nawr ngam tur thu a sawi lang. Hetihlai hian Ireland defender Shane Duffy chuan, "Kan lan dan chu eng pawh ni se kan duh ber chu World Cup khel tura tlin a ni," tiin a ṭul phawt chuan defensive game khelh an hreh loh tur thu a sawi.



Share this Post

Login to comment
No Comments