England squad-ah rawlthar rual

Germany nena friendly match-a goal khung loa inhnehtawk hlim England boss Gareth Southgate chuan ram tana la inlan ngai lo player pathum Dominic Solanke, Lewis Cook leh Angus Gunn te chu Brazil hmachhawn tur squad-ah a ko tel. Three Lions hian zanin dar 1:30-ah Brazil chu friendly match a khelhpui dawn a ni.

Manchester City goalkeeper Angus Gunn hian Norwich City lamah loan-in a hun a hmang mek a, Stoke goalkeeper Jack Butland-a'n training-na lama a kutah hliam a tawrh avanga koh a ni - Butland hi kar li aṭanga kar ruk vel tal a chawlh a ngai dawn a, Stoke tan thu hriat nuam a ni lo. 

England Under 20-in World Cup nomawi an chawi khan Solanke hi best player a ni a, Lewis Cook chu captain a ni thung. Kum 20 mi Solanke hian nipui transfer khan Chelsea chhuahsanin Liverpool a zawm a, Merseyside club tan hian match 10 a khelh tawhah goal a la khung lo. Bournemouth midfielder Lewis Cook-a'n Premier League match li a khel ve tawh a, Gunn-a'n City tan a la khel miah lo thung.

Three Lions manager Gareth Southgate chuan, "Kan U21 player-te tan senior team-a hun hman hi inzirna ṭha tak a ni dawn a, Brazil hmachhawn hi an tan chuan tawnhriat ropui tak a ni dawn a ni," tiin naupang rual chher a tum thu a sawi.



Share this Post

Login to comment
No Comments