Northern Ireland tan World Cup beisei a bo

Kum 1968 hnua a vawi khat nan Northern Ireland chuan World Cup khelh beiseina nei mah se an beiseina a thamral leh ta a, World Cup playoff-ah Switzerland chu 1-0 in an ngam lo.

Pathianni zan khan ram pahnih hian World Cup playoff second leg an khel a, goal khung loin inhnehtawk mah se an match hmasaah 1-0 a an lo tlawm tawh avangin inkhel pahnih belhkhawmah Switzerland an chungnung zawk - Northern Ireland beiseina a tawp a, Switzerland-in World Cup an khel dawn thung. 

Inkhel chu

Northern Ireland-a ram pahnih intawn hmasak ṭumin mual neitu lamin goal zawnah shot an nei miah lo a, Switzerland-ah erawh mikhual tlangnel zia chhuahin an khel ṭha hle thung. Hetihrual hian Switzerland-in chance nei lo erawh an ni bik lo a, minute 90 thleng thin thia an khelh loh chhanah a hun ṭha neih vawi tam khawhraltu striker Haris Seferovic chu dem tur a ni. 

Mikhual team tan Chris Brunt-a'n a hun ṭha neih a khawhral a, West Brom defender Jonny Evans-a'n hun pek belha a ball tauh chu line aṭangin Switzerland defender Ricardo Rodriguez chuan line aṭangin a lo pet chhuak hman bawk - Switzerland-in a zawna a vawi li nan World Cup an khel dawn a, Northern Ireland-in a vawi li nana World Cup khelh an beiseina chu a thamral thung. 

Penalty vang

Northern Ireland fan-te an tlak danah an lung a awi thei lo - an player leh coach te laka lawm lo an ni lo a, Switzerland lamin first leg-ah sawisel hlawh taka an penalty hmuh an chakpui hi an lawm lo a ni zawk. Windsor Park-a ram pahnih intawn hmasak ṭum khan Corry Evans handball vangin Switzerland hi penalty pek an ni a, ennawn erawh chuan Evans hian a kutin ball a tawk fuh lo thung.

Switzerland tan AC Milan defender Rodriguez chuan harsatna nei loin penalty hi goal-ah a chantir a, si khat phur chungin Northern Ireland-in Switzerland an pan a ṭul phah. Referee thutluknaa lungawi lo Northern Ireland boss Michael O'Neill-a'n a naute chu Switzerland-ah referee thutlukna chhanglet turin a fuih a, an pu sawi ang ngeiin khel ṭha viau mah se World Cup meuh erawh an inhlangkai zo chuang lo. 

Lungawi a har

Northern Ireland boss Michael O'Neill lung a awi thei ngang lo. An ram team enkawltu manager chuan, "First leg-a penalty sawisel hlawh tak avangin petchhuah kan ni ta. Kan beiseina chhit nun tumin theihtawp kan chhuah. Mahse, first leg-a referee khan inkhel a kaihruai chhe em a ni," a ti.

O'Neill chuan sawi chhunzawmin, "Red card phawrh ngeina turah Fabian Schar kha hnawhchhuah a ni lo a, kan tlawm dan hi a lungawi thlak loh a ni. Ka player te an lunghnur em em a, an hnathawh avang erawhin ka chhuang em em thung," a ti a, first leg-a referee chhe lutuk chu an chak loh chhanah a ngai.

O'Neill hma hun

Northern Ireland hian World Cup an khel thei dawn lo a, chumi ruala zawhna awm nghal chu an boss O'Neill hma hun a ni. Northern Irish manager hian Euro 2016 last 16-ah an ram team hi a hruai thleng a, kum li dang cham turin contract a ziak zui.

Mahse, beiseina sang tak nen World Cup an thlir hnuah a inpetkai pui zo lo a, Scotland leh Sunderland nen sawizawm mek a ni bawk. Mahse O'Neill hian a hmalam hun sawi a duh lo a, "Tun dinhmunah thil dang ka ngaihtuah lo," tiin a hma hun zawhna a chhang.



Share this Post

Login to comment
No Comments