Thih leh dam kar a ni - Samson BVT-in Lunglei tlangval Rintea tan khel dawn

Vawiin tlai dar 2:15 hian Ramhlun North leh Bethlehem Vengthlang FC te an inkhel dawn a, Mizoram Premier League Season 6 inkhel pawimawh tak hi Zonet-ah pekchhuah a ni ang.

Ramhlun North hian point nga hmuin table mawngphaha awm Dinthar FC nen an point hmuh zat a inang a, coach Samson Ramengmawia chuan, "Thih leh dam inkar a ni," tiin an inkhel a pawimawh thu a sawi.

Team ṭha zawk

Ramhlun North-in an defender thar Korhena A. Boekai an pho chhuak dawn a, coach Samson-a chuan, "Kan defender thar Korhena hi training aṭanga teh chuan a ṭha khawp mai a, tlarhnunga kan mamawh tak a ni," tiin a sawi a, Liberian defender hian Ṭhuamluaia Mualah a match hmasa ber a khel ang.

Ramhlun North boss chuan sawi chhunzawmin, "Chhuantea a dam tawh a, mamawh dan a zirin Notea chhawr theih a ni tawh a, kan intawn hmasak ṭum aiin kan ṭha tawh zawk," a ti. DSK Shivajians striker hlui Lalliansanga (Notea) inhliam hmain Samson-a hote hian match hmasa pahnih aṭangin point li an hmu a, match hnuhnung pangaah point khat chiah an hlawh chhuak tawh.

Samson-a chuan, "Hneh theih kan inring. Kan chak ngei ngei a ngai a, kan dinhmun hi thih leh dam inkar a ni. Player-te pawh an theihna zawng zawng chhuah turin kan fuih a, hnehna sual chhuah kan tum," tiin an theihna zawng zawnga an khelh tur thu a sawi.

BVT lam pawhin an player inhliam B. Zoramthara leh K. Lalnunzama te an chhawr thei tawh a, an dam kim tawh. Chawngthansanga hote hian match hnuhnung berah Aizawl FC phur lai 2-0 in an hneh a, table-ah pathumna an nih bawk avangin BVT hi an ṭhat vanglai tak a ni.

Lammuala an intawn hmasak ṭumin BVT hian 2-1 in hnehna an chang a, Ramhlun North-in foreigner pahnih nei mah se an zam phah lo ang.

Rintea tan

Bethlehem Vengthlang hian season liam ta khan an midfielder Lalrinawma Lianhna chu thihna vangin an chan. Ṭhuamluaia Muala an inkhelh hunah hian Lunglei tlangval Rintea hriatreng nan ribbon dum an hreng dawn a, club secretary Lalruatfela Hmar chuan Rintea tana an khelh tur leh chak ngei an tum thu a sawi.

Lawmthu sawizuiin Ruatfela Hmar chuan, "Kan patron K. Lalrohlua, project director DRDA Lunglei (Addl DC) chuan a quarters-ah hneh takin kan player-te leh official te an thleng a, an chungah kan lawm hle. Champhai aiin Lungleiah hian ṭantu pawh kan ngah zawk kan ring," tiin a sawi.



Share this Post

Login to comment
No Comments