FIFA U17 World Cup Germany barakhaihtu Iran chak chiang

FIFA U17 World Cup khelh mekah Thawhlehni zan khan result beisei loh a thleng a, Iran chuan 4-0 in Germany an sawp - last 16 khel turin an inpetkai chiang tawh tihna a ni. Group C inkhel dangah Costa Rica leh Guinea chu 2-2 in an inhnehtawk bawk. 

Spain-in an match hmasa berah Brazil ngam lo mah se an match hnihnaah team ṭha an ni tih an pholang a, Niger chu 4-0 ngawtin an sawp. Brazil-in last 16-a an hmun an tichiang tawh bawk a, an match hmasa bera Spain an hneh hnuah North Korea chu 2-0 in an hneh leh ta bawk.

Iran an vul

Goa-a inkhelah Iran aiin Germany chu rin hlawh zawk an ni a, mahse inkhel hamrik a rik rualin Iran-in team chungnung zawk an nihzia an pholang - inkhel ṭan aṭanga minute rukna lekah Younes Delfi chuan goal hmahruai a khung nghal a, Iranian club Esteghlal Khuzestan striker hian minute 15-naah free kick hmangin bar a pet per bawk.

Minute 42-naa a freekick petah erawh Delfi a vanduai nawn tawh lo - an goal hnihna a khung chhunzawm. Germany goalkeeper Luca Plogmann chet ṭhat zan ni lo se chuan Iran hian first half-ah an chak an nemnghet fel der tawh ang. Mahse, Werder Bremen keeper chet ṭhat zan a ni a, a ṭhiante an chet ṭhat ve miau loh avangin goal erawh ven sen vek a ni lo.

Iran an sang

Chawlhlawk hman a nih hnuah pawh Iran an chungnun chhunzawm. Second half ṭan a nih aṭanga minute lina lekah Germany 'comeback' beiseina awm thei zawng zawng an thai chhiat sak a, Delfi cross ṭha zet chu Allayahr Sayyad chuan an goal thumna ni turin a khung. 

Germany-in nguai mai loin nawr chhunzawm mah se goal thum lai an chhuah tawh avangin European team ṭha tan Asian team lakah chak beiseina a bo tawh a, Vahid Namdari chuan minute 75-naah counter attack hmanga khung chhunzawm lehin Iran an chak chiang - Iran hian an match hmasa berah Guinea chu 3-1 ngawta an sawp tawh bawk avangin last 16 an lut chiang.

Spain tan Ruiz

World Cup ṭan hmain Abel Ruiz hming a langsar a, mahse Barcelona forward hian an match hmasa bera Brazil an hmachhawnna inkhelah a thiamna a pholang thei lo a, Niger lakah erawh goal hnih a khung thung - Spain tan Cesar Gelabert leh Sergio Gomez ten goal khat ve ve an khung bawk a, Niger lamin a chhanletna tur an nei ve lo.

Brazil-in goal khung thiam an ni tih an pholang ve zel bawk a, North Korea lakah goal hnih khungin hnehna an chang. Brazil tan Spain 2-1 a an hneh ṭuma goal khungtu pahnih Lincoln leh Paulinho te bawkin goal an khung a, hnehna an chang. Brazil-in awlsam takin last 16 an lut a, North Korea erawh knockout stage lut turin beiseina a chau ta hle.



Share this Post

Login to comment
No Comments