Lungleiin MPL fixture ṭha an chang

Chanmari FC Vs Chhinga Veng

Mizoram Premier League Season 6-ah chung leng Chhinga Veng leh Chanmari FC inkhel hi en châkawm ber zinga mi a ni a, Ṭhuamluaia Muala khelh a nih dawn avangin Lunglei mipui an vanneih phah. 

Vawiin chawhma dar 11:30 hian table-a a sang pahnih te hi an inhmachhawn dawn a, inkhel hmuhnawm tak a beisei ngam ang.

19 not out

Chhinga Veng hian coach Lalsangzuala Hmar hnuaiah tlawm hmel hmu loin match 19 chhung an kal tawh a, Chanmari FC-in tun hmain H. Vanlalthlanga hnuaiah match 21 chhung chak loh nei loin an kaltluang tawh bawk. Chanmarians record duhawm lehpel turin Chhingcows-in match thum bak an mamawh tawh lo.

Sanga chuan, "Record hi a hlu a, kan duh ber erawh result ṭha a ni thung. Tun dinhmunah chuan semifinal ticket bak hi inchuh kan nei lo a, semifinal thlen phawt kan duh," tiin Vanglaini a hrilh

Semifinal kawng

Chhinga Veng FC-in point 17 hmuin hmahruaitu an ni a, point thum dang an hmu leh a nih chuan semifinal an lut chiang tawhah a ngaih theih ang. 

Hetihlai hian Chanmari FC erawh pahnihna dinhmun hauh mah se pathumna Bethlehem Vengthlang FC nen point 12 ve ve an hmu a, Chhinga Veng laka point an hmu lo a nih chuan ngaih ṭha takin an awm thei tawh lo ang.

3 - 0 a ni mek

Tun season chhungin Chhinga Veng leh Chanmari FC te vawi thum an inkhel tawh a, Chhingcows-in hnehna an chang vek. I Day Football-ah Thlanga hote hi group stage leh final-ah an hneh a, MPL-ah a lungthu kim nan an chak leh bawk.

Tun hi an vawi li inkhelhna tur a ni a, record en chuan Chhingcows hi chak tura rin an ni a; 3-0 hi 4-0 ah a sang chho a nih pawhin thil mak a ni lo ang.

Alex Out, MC-a In

An intawn hnuhnun ber hian Chanmari FC-in Alex Whittemore an hmachhuan a, amaherawhchu Liberian forward hian goal khungah harsatna a neih avangin an chhuah. 

MPL champion laiin Alex thlak nana an lakluh chu MC Malsawmzuala a ni a, Siaha tlangval hian MPL-ah Dinthar FC, Luangmual FC leh Ramhlun North tan te khel tawhin goal thum a khung tawh a, Liberian striker ai chuan sulhnu a nei ṭha zawk. Ṭhuamluaia Mualah MC-a fiahin a awm dawn.

Engtin zel?

Chhinga Veng FC-in champion ngei tumin foreigner pahnih an chah chhuak a, amaherawhchu document fel lo a awm avangin an khelh hman a rinawm loh. Coach Sanga chuan, "Kan player thar Lungleiah hruai mah ila chhawr lo turin kan rilru kan siam a ṭul. Kan tana thu lawmawm chu kan player an dam kim tawh a, duh thlan tur player ka kawl a ni," tiin a sawi.

Chhingcows hian an match hnuhnung berah Dinthar FC 3-1 in an hneh a, Malsawmfela'n goal a khung leh tawh. Ramhlun South tlangval hian MPL6-ah goal ruk a khung tawh a, Chanmari FC-in MPL nomawi chawi puitu striker hi an ven uluk a ṭul ang.

Chanmari FC hian Chhinga Veng an hneh loh hnuah Bethlehem Vengthlang leh Chanmari West te an draw a, match thum chhung chak an nei tawh lo. MPL champion lai hian Lungleiah an record duhawm loh tak hi tihtawp an duh dawn a, chumi ruala coach Sanga hnuaia hneh loh la tawng lo Chhinga Veng hneh chu result duhawm bik a ni thei ang.



Share this Post

Login to comment
No Comments