Aguero-a'n training a zawm

Manchester City striker Sergio Aguero chuan hliam a tawrh aṭanga ni 11 hnu lekah team training a zawm leh thei ta. Argentina international hi Amsterdam-ah a car chuanna a chesual a, a nakruh a hliam a ni.

Kum 29 mi Aguero hian hliam a tawrh tirh chuan amah enkawltu Dr Villani-a'n thla khat leh a chanve vel tal a chawlh a ngaih a rin thu sawi mah se beisei aia hmain training a zawm leh thei ta a ni.

Thuchhuah siamin Man City chuan, "Aguero hian a fitness ti ṭha turin a bei mek a, hun rei lote chhungin first team-ah a rawn kir leh beisei a ni," an ti. Aguero hian City tan inelna hrang hrangah goal 176 a khung tawh a, club tana goal khung hnem ber Eric Brook (177 goals) tluk turin goal khat bak a mamawh tawh lo.

Pep Guardiola kaihhruai Manchester City hian tun season Premier League match sarih an khelhah point 19 hmuin hmahruaitu an ni mek a, Inrinni zan dar 7:30 hian Etihad Stadium-ah Stoke City an mikhual ang.



Share this Post

Login to comment
No Comments