Ghana hmachhawn tur India a inpeih

Zanin dar 8:00-ah India chuan Ghana an hmachhawn dawn a, he inkhel hmachhawn tur hian coach Luis Matos chuan an inpeih tawh thu a sawi. Benfica B team boss hlui chuan, "Ka naute hi an hmaa chona inchhawp hmachhawn turin an inpeih tawh a, kan theihna zawng zawng pein history ziah danglam kan tum dawn a ni," a ti.

India hian an match hmasa bera USA (3-0) an ngam loh hnuah inkhel hmuhnawm takah Colombia chu 2-1 in an ngam lo a, Jeakson Singh chuan FIFA tournament-a India goal hmasa ber khung mah se hnehna a chanpui zo lo. Hetichung hian Colombia laka an khelh danah India team-in fak an hlawh a, zaninah pawh mipuiin inkhel hmuhnawm an beisei ang.

Luis Matos chuan, "Chak result hlawhchhuah tumin kan khel dawn. Khawvel hmaah kan elpuite nen hian kan intluk tawk reng a ni tih kan pholang tawh a, tunah chuan kan hneh thei tih pholan a hun ve tawh thung," tiin a naute chak pui ngei a tum.

Hetihrual hian India coach chuan hnehna chang turin thawhrim a ngai dawn tih a hai bik lo. Portuguese coach chuan, "Ghana hi an tharum dawn tih a chiang reng a, rilru huaisen tak kan neih a ṭul dawn a ni. Tharum ngah leh rang tak taka ball inpek thiam tak an ni a, hei vang tak hian hnehna chang tur chuan kan rilru zawng zawng kan pek a ṭul dawn," a ti.

Colombia laka goal khungtu Jeakson Singh chuan, "Ghana hi team ṭha tak an ni. Mahse, he chona hmachhawn tur hian kan inpeih tawh. Ghana hmachhawn hi a hautak dawn tih ka hria a, mah se ka sawi nawn leh duh chu kan inpeih tawh tih hi a ni," tiin a inringtawk hle. 

India captain  Amarjit Singh chuan, "Ghana hi kan zah em em a, mah se huaisen takin kan bei dawn. Colombia laka kan khelh dan ai maha ṭhaa khelh kan tum dawn a, thih leh dam kara leng kan nih avangin last 16 lut turin theihtawp kan chhuah ang," a ti.

Match hmasa pahnihah India goalkeeper Dheeraj Singh-a'n fak a hlawh a, Manipur keeper hi Bundesliga club langsar Borussia Monchengladbach leh MLS club hming tarlan loh chuan an rim mek niin an sawi hial.

Dheeraj chuan, "Ghana lakah mipui ṭawiawmna kan mamawh dawn a, kan theihna zawng zawng kan pe ang. Match hmasa ang khan min ṭawiawm turin mipui ka sawm duh a, ngui takin kan haw tir lo ang tih ka sawi ngam a ni," a ti a, a inringtawk hle.



Share this Post

Login to comment
No Comments