BVT-in Chhinga Veng dang zo lo

Great Sports I Day Football-ah Chhinga Veng FC-in nimin khan Bethlehem Vengthlang FC 2-1 a hnehin final an thleng. Independence Day (August 15)-ah Chhingcows hian I League champion Aizawl FC hnehtu Chanmari FC nen nomawi an inchuh ang.

Ruahsur hnuaia Lammuala inkhelah Chhinga Veng tana R. Malsawmtluanga goal chu BVT-in Ramengmawia hmangin sut mah se Chhingcows striker Malsawmfela chakna goal a khung.

Nuam nuam nuam

Lalsangzuala Hmar hnuaiah Chhingcows-in season ṭha tak an hmang chhunzawm zel. Chhinga Veng mipuiin MFA Super Cup an champion vanga 'nuam nuam nuam' tiha Lammuala tual an chai hnuah an ban phakah I Day Football nomawi a awm leh ta.

Nimin inkhelah player ṭha danglamna a lang a, MFA Super Cup final-a goal ropui khungtu MS-a'n a class san zia first half-ah pholang. Chhinga Veng midfielder MS-a hian Laldampuia siam sak chu box pawn aṭangin goal kilah a pet lut a, keeper Lalruatpuia tan chet hman ngaihna a awm lo.

BVT-in in an siphurh sut theih nan striker thar PC Lallawmkima'n ball tauh chu Chhingcows keeper Zothanmawia'n man nghet zo loin awmna hmun fuh Ramenga'n siphurh sutna goal a khung.

Ruahsur leh chhum zing vangin team pahnihin an ṭhat dan ber an lantir thei lo a, an inhnehtawk bawk. Minute 63-naah Sawmfela'n box chhungah la lutin chakna goal a khung a, Chhinga Veng striker hian I Day Football match nga a khelh tawhah goal khung vekin goal ruk a khung tawh a, top scorer a ni mek.

Vanduai nawn

Bethlehem Vengthlang FC coach Chawngthansanga'n MFA Super Cup quarterfinal-ah Chhingcows 1-0 in an hneh lo a, hemi hnu hian residential camp te neiin an thawkrim hle.

Nimin inkhelah an intawn hmasak ṭum ang thoin BVT-in Chhingcows bei tawk mah se minute 90 chhunga goal khung tlem zawk an ni a, a vawi hnih nan an vanduai.

Sanga hmaah nomawi

Chhinga Veng coach Lalsangzuala Hmar-in I Day Football nomawi chu la chawi ngai loh avangin season khata nomawi pathum lak theih zingah a la châk ber a nih thu Vanglaini a hrilh tawh a, tunah chuan a hmaah tun dinhmun a thlen theihna tura mi pawimawh H. Vanlalthlanga enkawl Chanmari FC chiah a awm tawh.

Chhingcows hian group stage-ah Chanmari FC hi 5-1 in an sawp tawh a, he inkhel aṭanga thlir chuan Sanga duhthusam hi a thlen theih a rinawm ta hle. Chhinga Veng hian Sanga hnuaia match 11 an khelh tawhah an la chak vek a, goal 69 an khung tawh a, an record ṭha tak hi final-a tawp tir an duh lo ang.



Share this Post

Login to comment
No Comments