Usain Bolt tan zan hnuhnung

Khawvel mihring zinga tlan chak ber record chelh mek tu Usain Bolt chuan zanin 2:20 hian intlansiak khawvela a hun hnuhnung a hmang dawn. London-a World Championship neih mekah an ram Jamaica tan 4x100m relay inelnaah a inlan dawn a ni.

Kum 30 mi Bolt hian World Championship neih ṭan hma khan London-a inelna neih zawh hunah intlansiak a chawlhsan tur thu a sawi lawk tawh a, tun ṭumah hian 100m-ah gold a lak phak loh avangin 4x100m relay bikah hi chuan gold lak a duhna a sang zual hle ang.

Olympic gold medal pariat kawl mektu Bolt chuan, "Ka kum a upa ve deuh tawh a, hliam neih hnua rawn kir leh ka nih bawk avangin thil hi tun hma angin a awlsam vek tawh lo," a ti. Bolt hian a tan hahchawlh a hun ve tawh hlein a hriat thu a sawi tel bawk.

Jamaican sprinter Bolt chuan sawi zuiin, "Intlansiak khawvela hun ka hman chhungin pakhatna ka ni fo a, 100m ka tlan hnuhnung berah khan pakhatna ni lo mah ila ka sulhnu a thai bo chuang lo. Tih takzeta kan beih hi chuan eng pawh a thleng thei tih hi infiamna khawvel aṭang ka zir chhuah lian tak pakhat chu a ni," tiin a sawi.



Share this Post

Login to comment
No Comments