Third round-ah Rafael Nadal a tla

Rafael Nadal-a'n world number 1 nih theihna hun ṭha nei mah se a hmang ṭangkai thei rih lo. Ningani zan nan khan Spain tlangval hi rawlthar Denis Shapovalov lakah chak loin Rogers Cup third round aṭangin a tla.

World number 2 Nadal hian a match hmasa berah harsat lo takin hnehna chang mah se a vawi hnihnaah erawh beisei a phak lo. Darkar hnih leh minute 45 an inkhelh chhungin aces vawi hnih chiah a siam a, double fault vawi ruk a neih bawk si a vangin 3-6, 6-4, 7-6 (7/4) in a chak lo.

Grand Slam vawi 14 champion tawh Nadal hian Rogers Cup-ah hian semifinal thleng phak se la chuan kar thara world ranking chhuak tharah chuan Andy Murray luahlanin number a ni dawn. Mahse, a sang pali zinga a inhlan kai theih loh avangin ranking-ah a chung berah a la lawn thei rih dawn lo tihna a ni.

Canadian rawlthar Shapovalov hi kum 18 mi chauh a la ni a, ATP Masters 1000 event-ah quarterfinal lut thei naupang ber a ni. World number 787 Shapovalov hian round hmasa lamah Rogerio Dutra Silva leh US Open champion hlui Juan Martin Del Potro te a hneh tawh bawk a, tun inelna bikah chuan khel ṭha tluang ber pakhat a ni.

Inkhel dangah world number 3 Roger Federer chuan set hmasa ber a hloh zet hnuah David Ferrer chu 4-6, 6-4, 6-2 a hneh letin quarterfinal a lut. Swiss star Federer hian June 14 hnu lama a vawi khat nan set a hloh leh chiah - Wimbledon-ah khan set hloh miah loin a champion thei a ni.

Tunkara kum 36 tling hlim Federer hian a match lehpekah chuan Roberto Bautista Agut a hmachhawn dawn. Seeded 12-na Bautista Agut hian Gael Monfils chu 4-6, 7-6(5), 7-6(2) in a hneh ve bawk. Player dang Diego Schwartzman leh Alexander Zverev te pawhin a sang pariatah hmun an chang ve bawk.



Share this Post

Login to comment
No Comments