Premier League Team thar, player thar, manager thar leh dan thar

Nizanah Premier League 2018-19 season match hmasa ber khelh a ni tawh a, ṭum dang ang bawkin team thar, player thar leh manager thar hmuh tur an awm dawn a, kum danga kan hriat ngai loh 'dan thar' hmuh tur a awm dawn bawk.

Tun hnai European football-ah English club-ten beisei phak ṭhin lo mah se media an chak piah lamah sum a tam miau avangin lar leh sum duhin manager ṭha leh footballer ṭhaten Premier League an la pan reng a, Arsene Wenger, Antonio Conte, Jurgen Klopp, Jose Mourinho, Mauricio Pochettino leh Pep Guardiola-te awm khawmna league hi khawvela league ngaihven hlawh ber a ni lo thei lo.

Team thar

Premier League-ah season tinin team pathum Championship lamah an tla thla ṭhin a, season hman zawh takah khan  Sunderland, Middlesbrough leh Hull City-te chuan Premier League mangṭhain Championship lamah nun bul an ṭan leh der tawh.

Club pathum hmunruak luah turin Newcastle United, Brighton & Hove Albion leh Huddersfield Town-te chu Championship aṭangin an inpetkai thung a, Liverpool manager hlui Rafael Benitez hoa khel tur Magpies hi 'club thar' zinga tawh khirh pawl ni tura ngaih an ni. 

Sum sen

Premier League club ten TV deal aṭangin sum an hmu hnem a, August 10 thleng kha chuan player lakluh nana an sum sen belhkhawm hi pound tluklehdingawn 1.034 a ni - transfer bazar hun a tawp meuh chuan nikum nipui transfer-a Premier League-te sum sen zat pound tluklehdingawn 1.165 chu an khum ngei tura ngaih a ni.

Ṭum dang ang bawkin Manchester City-in player lakluh nan sum an seng hnem a, pound maktaduai 200 chuang an seng tawh. Manchester United-in pound maktaduai 140 chuang an seng tawh a, Everton meuh pawhin pound maktaduai 80 chuang an thehchhuak tawh a, kai thar Huddersfield leh Brighton-ten player an lakluh apiangin an club record neihsa an khum emaw ni tih mai tur a ni bawk.

Dai loh ram

Premier League club inkarah transfer liantham tak tak awm mah se a vawi khat nana English football-a an hmel lan turten ngaihven an hlawh lehzual ang. Player langsar zingah Bernardo Silva, Benjamin Mendy, Alexandre Lacazette leh Alvaro Morata te chu a vawi khat nana Premier League pan vek an ni - season duhawm tak hman an duh ang. 

Manchester United-a a hming lo chher tawh Javier Hernandez -a'n West Ham jersey ha chungin Premier League a khel leh dawn a, Chelsea-a hlawhchham tawh Mohamed Salah-a'n Liverpool-ah a ṭhat tawk zia pholan a tum dawn a, Ajax captain hlui Davy Klaassen-a ṭhat tawk leh tawk loh Everton-ah hmuh turin a awm dawn bawk.

Manager thar

Premier League manager zingah hmel thar pahnih hmuh tur an awm dawn, Frank de Boer chuan Sam Allardyce hmunruak luahin Crystal Palace enkawl hna a thawk a, Reds defender hlui Mauricio Pellegrino chuan a vawi khat nan English football club enkawlin Southampton boss a ni.

Season hmasa tawp lama Hull City boss Marco Silva-a'n a club a thlak a, Championship lama Hull an tlak hnuah Watford a pan a, season hmasa Premier League-a Leicester City boss lailawk Craig Shakespeare chuan a nghetin Foxes manager hna a thawk ta bawk.

Dive = hrem

Football Association-in dan thar an siam a, player zingah tlu der an awm a nih chuan match hnih khel thei lo tura hrem an ni zel tawh ang. Referee-in player dang dive hmu loa amah tawk futu anga lang chu a hnawt chhuak a nih chuan player hremna chu hlihsak leh theih a ni a, Thawhṭanni apiangin FA panel-in a thlirletna a nei ṭhin ang.

Premier League club-te chu an khelmual grass chei phalsak an ni dawn lo a, Spurs-in Wembley Stadium an home match khelh nan an hmang ang a, Brighton khelmual Amex Stadium leh Huddersfield khelmual John Smith's Stadium-te chuan a vawi khat nan Premier League an thleng dawn bawk.

Ball pet tur

Premier League-a an ball pet tur hi a hming chu Nike Ordem V-a  ni. A ball rawng hi a sen, dumde rawng, a pawl tak leh rawng var inchawhpawlh a ni a, Nike chuan, "Player-ten ball an hmuh awlsam theih nan a rawng lar hi kan thlang a ni," an ti.

Premier League-ah hian khualmuala inkhel en tura kal fan-te chu an ṭhut ho theih nan ṭhutna bik siamsak an ni zel tawh dawn a, pitch hnaih lamah block khat tal an ṭhutna tur siam a ni dawn bawk. Video technology chu technical area-ah doctor tan hman theih a ni dawn a, hei hi rang taka player inhliamna lai tak an hmuh theih nan tih a ni. Season hmasa thleng kha chuan tunnel tih lohah chuan doctor tan video technology hi hman theih a ni lo a ni.



Share this Post

Login to comment
No Comments